Liverpool-in Kerkez an hnaih

Premier League hmahruaitu Liverpool chuan Bournemouth aṭangin left back Milos Kerkez an la lut hnai niin khawthlang media-ten an tarlang a, Manchester City leh Manchester United pawhin lakluh duh mah se, Kerkez hian Anfield lam a hawi niin an sawi.

Hungary international Kerkez hian season hmasa khan Dutch club ṭha AZ Alkmaar aṭangin Bournemouth hi a zawm a, Premier League-ah tlangnel nghalin, a season hmasa berah match 28 a khel nghal a, inelna hrang hrangah match 33 a khel.

Tun season-a Cherries chet ṭhat nan player pawimawh niin, league-ah match 21 khelin goal khat a khung tawh a, assist vawi thum a nei bawk. City leh United-in duh mah se, Cherries-a amah thlem luttu Richard Hughes chu Liverpool-ah Sporting Directord a ni tawh a, Hughes hian a hmin niin an sawi.

Cherries hian Kerkez-a manah hian pound maktaduai 50 an chhiar a, Liverpool hian Andy Robertson leh Konstantinos Tsimikas an neih tho avangin heti zat hian Kerkez hi an la lut duh ang em, tih chu zawhna a awm.

Hetihrual hian Kerkez hi Dutch league-a khel ṭhin a nih avangin Feyenoord boss hlui, Liverpool coach Arne Slot pawhin a hrechiang ang tih a hriat a, Hungary-a a khelhpui leh captain ni bawk Dominik Szoboszlai chu Liverpool-ah a khel mek bawk.