Wales champion theih beiseitu Henry

Arsenal striker ropui ṭhin Thierry Henry chuan Euro 2016 France-ah Wales an champion theih a rin thu a sawi.

French striker chuan Euro qualifier Group B hmahruaitu Wales chuan mahni inrintawkna chiah an mamawh thu sawiin, "Wales hi Euro khel turin an dinhmun a ṭha tawh hle a, an qualify a nih ngat chuan champion theih inring chung leh tum chungin France an pan tur a ni," a ti.

Euro 2000 champion team France-a an striker rinrawl Henry chuan, "Kum 2004 Euro kha thlir let ila, tuman Greece an champion kan ring lo. Mahse, an cham­pion miau si," tiin Wales chu rinkai ni lo mahse an cham­pion theih a rin thu a sawi.

Wales hian Euro qualifier Group B hmahruaitu ni turin kar hmasa khan rinkai zawk Belgium 1-0 in an hneh a, game li khelh tur an la hmabak.