Ropui takin Andre Ward a lo kir

Thla 19 zet boxing a chawlhsan tawh hnuin American boxer Andre Ward ring chhungah a lo kir leh a, Inrinni khan British boxer Paul Smith chu California-ah inhnek puiin chak zawkah a ṭang.

Vawi 28 a inhnek tawha tlawm hmel la hmu lo super-middleweight champion Andre Ward hian inhnek ṭan tir aṭangin ring chhungah hian ro a rel nghal. Round kua naah Paul Smith-a thisen a chhuah nasat avangin a trainer te'n towel an theh lut a, a lo kir lehna inhnekah Ward-a chak nghal.

Athens Olympic 2004 gold medalist Ward hian 2013-a Edwin Rodriguez a hneh hnuin tumah a la hnek leh lo. Hei hi a promoter ṭhin September 2014 a boral ta Dan Goosen nen an inhmuhthiam loh vang a ni.

Kumin January khan Ward hian fighter lar zinga a hmasa ber ni turin rapper lar Jay Z-a company Roc Nation Sports tan contract a ziak.

An inhnek chhung zawnga talbuai mang lo Ward chuan, "Ropui taka lo kir leh hi ka duh a, ka beisei ang ngeiin ka chak ta a ni. Coach ṭha leh thawkrim tak ka nei a, thlamuang tak leh hahdam taka khel turin min fuih a, a zarah hnehna ka chang a ni," a ti.