FIFA U20 World Cup Serbia an champion

Extra time-a Nemanja Maksimovic goal hmang­in Serbia-in FIFA U20 World Cup final-ah Brazil 2-1 in an hneh. Serbia hi an indan hnua an vawi khat champion-na a ni a, kum 1987 khan Yugoslavia angin an champion tawh bawk.

Inrinni khan North Harbour Stadium, Auck­land-ah final khelh a ni a. Minute 70-naa Stanisa Mandic goal hmangin Serbia-in hma an hruai a, Brazil-in minute thum hnu lekah Manchester United forward Andreas Pereira hmangin an sut. Minute 90 chhungin team pahnih an inhnehtawk a, extra time khelh zui niin penal­ty shootout pet nana minute hnih chiah a awm tawh tihin Maksimovic-a'n Serbia chakna goal a khung.

FIFA U20 World Cup-ah hian pathumna chu Mali an ni a, mid­fielder Adama Traore chuan goal li khungin assist vawi thum a nei a, Golden Ball a dawng. Kum 19-a upa Traore hi French club Lille tan a khel mek. Silver ball hi Brazil rawlthar Danilo-a'n a dawng a, ani hi Portuguese club Braga defensivie midfieler a ni. Bronze ball hi Serbia central midfielder Sergej Milinkovic Savic a ni a, Belgian club Genk tana khel lai a ni.

Ukraine midfielder Viktor Kovalenko-a'n goal nga a khung a, assist vawi hnih nei bawkin Golden boot a dawng. FC Shakhtar Donetsk midfielder khung zat chiah hi Hungary forward Bence Mervo-a'n amaherawhchu Hungarian club Gyor forward hian assist a nei loh avangin Silver boot a dawng. Germany attacking midfielder Marc Stendera-a'n goal li khungin Brone boot a dawng a, Eintracht Frankfurt midfielder hian assist vawi li a nei bawk.

Serbia keeper Predrag Rajkovic-a'n adidas Golden Glove a dawng a, feet ruk leh inches thuma sang keeper hi Red Star Belgrade tan a khel mek.

FIFA U20 World Cup-ah Argentina vawi ruk an champion tawh a, tun ṭuma pahnihna Brazil hi vawi nga champion tawh an ni. Portugal vawi hnih an champion tawh a; Ghana, Spain, Soviet Union, West Germany, France, Yugoslavia leh Serbia te vawi khat ṭheuh an champion tawh bawk.