Maradona'n Boca Juniors-ah Tevez a lo lawm lawk
Khawvel footballer ropui ber pawl leh Boca Juniors chhuanvawr ni ṭhin Diego Maradona chuan facebook lamah Boca Juniors lama kir leh angin Carlos Tevez a lo lawm lawk.
Maradona hi kum 2005 khan Boca Juniors-ah vice president a ni a, kum 2008-2010 chhung khan Argentina team-ah Tevez nen hian an lo inhrawn tawh bawk.
Juventus striker Tevez hi a pianna ram lamah hian kir leh tura sawi thuthang a tam hle a, hetiang thuthang a awm mek laia facebook lama Maradona thil tarlan hian titi a ti tam hle.
Season hman zawh tak Serie A-a goal 20 khungtu Tevez hi season tharah a club khelh mekna Juventus chhuahsan tur anga sawi a ni a, amah duhtu zingah Europe club lian tak tak Liverpool, Atletico Madrid leh Paris St-Germain te chu hming langsar pawl an ni.
Kum 31-a upa striker hian kum 2001-2004 chhung khan Boca Juniors tan a khel a, match 110 a inlanah goal 38 thun hmanin league title vawi khat, Copa Libertadores leh cup trophy te a chawi pui. Boca-a cham chhungin Tevez a langsar a, kum thum chhung chu a zawnin South American Player of the Year-ah thlan a ni.
Kum 2005 khan Brazil club ṭha Corinthians a zawm a, heta ṭang hian West Ham zawm lehin Manchester United leh City te Premier League-ah a champion pu ve ve a, Italy-ah Juventus chu Serie A-ah a zawnin a champion pui leh bawk.