English player-te an to uchuak - Ferdinand

Manchester United defen­der hlui Rio Ferdinand chuan English player-te chu an man phu tawk aia an to uchuak ṭhin thu a sawi chhuak.

Kum 2002-a a hunlaia khawvel defender man to ber ni tura pound maktaduai 29.1 a Manchester United pantu Ferdinand chuan, "English player-te hi an man a to uchuak em em a, an man zat atana an chhiar ṭhin hi a nuihzatthlak zawk a ni," a ti.

May thlaa football a chawlhsan thu puangtu Fer­dinand-a thusawi hi a dikna chen a awm laiin, English player zawng zawngah chuan a khai rual theih kher lo ang.

Tun nipui transfer bikah England international James Milner leh Tom Cleverley-te chuan Liverpool leh Everton free transfer-in an zawm a, defender Micah Richards chu Aston Villa-in a thlawnin an la lut bawk.

Tun nipui transfer-a Eng­lish player Premier League club-a insawn kual zingah manto uchuak an la awm lo. Tottenham in Kieran Trippier chu pound maktaduai 3.5 in an la lut a, Danny Ings chu zângnadawmna pawisa tlem pek turin Liverpool-in an la lut bawk.

Hetihlai hian Tottenham Hotspurs striker Harry Kane chu pound maktaduai 50-in Manchester United-in an ngam nia sawi a ni a, Manchester City-in pound maktaduai 40-a lei an tum Raheem Sterling chu Liverpool-in pound maktaduai 50 an chhiar bawk.

Queen Park Rangers-a a hun tawp hmangtu Ferdinand chuan ram pawn lam player te chu an ṭhat dan chhutin an man a tlawm hle zawka a hriat thu sawiin, "Manchester City striker Sergio Aguero leh Arsenal forward Alexis Sanchez te thiamna leh an man zat hi thlir ila, Aguero manah City-in pound maktaduai 38 an seng a, Sanchez manah Arsenal-in pound maktaduai 32 an seng thung. An man hi English player nena khaikhin chuan a tlawm hle a ni," a ti.

British player zingah Liverpool-in January 2011-a Newcastle United aṭanga pound maktaduai 35-a an lei Andy Carroll aia man to erawh an la awm lo.