Liverpool-in Charlton defender Gomez la lut

Tun nipui transfer-a an player lak luh palina turin Liverpool chuan Charlton Athletic aṭangin Joe Gomez chu pound maktaduai 3.5-in an la lut.

England Under-19 international hian Zirtawpni khan Anfield-ah medical paltlangin kum nga cham turin contract a ziak a ni.

Kum 18-a upa defender hian pre-season chu Liverpool-ah a hun a hmang ang a, season ṭan dawnah erawh loan-in Championship club Derby County lam a pan tura ngaih a ni.

2014 European Championship U-17 a England champion puitu Gomez chuan Liverpool a pan thei chu mumang ang mai a nih thu sawiin, "Ka tan chuan mumang thleng dik ang mai a ni a, thil awihawm lo leh awih har tak, engtia thleng mai nge a nih pawh ka hriatthiam loh a ni. Liverpool tana khelh hi ka chak tawh takzet a ni," a ti.

Gomez chuan sawi chhunzawmin, "He club hian chanchin ropui tak a nei a, club ropui tak ka naupan lai aṭanga ka ṭan em em ṭhin a ni. Helai hmun hi kal ka lo châk tawh em em ṭhinna a nih avangin ka tan chuan thutlukna siam a harsa lo," tiin Liverpool pan tura a ngaihtuahna a sen tam loh thu a sawi.

Hmabak eng tak nei anga an sawi Gomez hian season hmasa khan Charlton tan match 24 a khel a, Liverpool-in tun nipui transfer-a an lak luh ve tho midfielder James Milner, striker Danny Ings leh goalkeeper Adam Bogdan te chu Anfield-ah hian a zawm dawn a ni.