Neymar-a'n mawhphurhna la zo lo
Brazil hi football ram ropui an ni a, amaherawhchu tunhnai inelna lianah beisei an phak lo
ṭhin hle. FIFA World Cup vawi nga champion tawh Brazil-in nikum khan an ram ngeiah football inelna lian hi an thleng a, bul ṭan ṭha mah se semifinal-ah 2002 World Cup final-a an hneh Germany lakah 7-1 in an tlawm.
An rama Brazil mualpho ṭum hian Neymar a inlan thei lo a, Brazil captain hi quarterfinal-a Colombia an hneh ṭumin a inhliam a, Brazil mipuiin Barcelona forward tel loh vangah talbuaiah an ingai a, a dikna chen pawh a awm bawk.
Amaherawhchu Brazil hian tunhma an pha lo tih erawh a chiang. Pele hunlai khan an thiampuipa Pele ber a inliam chuan Garrincha a la awm a, an buai phah lo. Hemi hnu pawh hian star pakhat aia tam an nei zel a, Romario a inhliam chuan mawhphurhna latu Bebeto a ṭha tawk. Kum 2000 hnu lamah Ronaldinho a chet thei loh chuan Ronaldo emaw Rivaldo emaw an la awm cheu. Tunah erawh Neymar chauh a awm a, Brazil hi an captain tel lo chuan an che thei lo.
Colombia khan Nilaini zana Brazil an tum ṭum khan Neymar pawimawhzia chu an hrechiang hle. Barcelona forward hi ven bik a ni a, Juan Guillermo Cuadrado-a'n ṭum khat a nghawk tlu a, World Cup-a Neymar hliamtu Juan Camilo Zuniga-a'n vawi engemaw zat a pet thlu leh bawk. Colombia coach Jose Pekerman game plan a hlawhtling a, point thum an hlawhchhuak.
Hun tawp hamrik ham zawhah Neymar a insum zo lo a, Colombia defender Jeison Murillo a pet per avangin red card a hmu a, insum zawh loh vangin match khat an hrem dawn tih a chiang tawh. Chak lo lungawi lo, Neymar-a'n a thirimna referee Enrique Osses lakah a hri tla a, match thum dang an hrem belh phah.
Neymar hi ball pet luih vanga match li khel thei lo tura hrem chu nise pawm a harsa khawp ang. Amaherawhchu inkhelh banah Neymar hian Chilean referee hnenah, "Lar i duh vangin min hrem," tiin a sawi a, ṭawngkam mawi lo a hmang zui bawk. Hei vang hian match li baka US dollar 10,000 a chawi hi hremna awm tak a ni.
Match li chhung an hrem avangin Copa America-ah Neymar a inlan thei dawn lo. Brazil-in captain tel loin Copa America an khel chhunzawm dawn. Tukin zing khan Venezuala an hmachhawn a, result a zirin quarterfinal an lut ang.
Neymar hian season liamta khan Barcelona tan inelna hrang hrangah goal 39 a khung a; Champions League, La Liga leh Copa del Rey-ah a champion pui bawk. Barcelona-ah Neymar hi rinrawl ber a ni lo a, player ṭha bik Lionel Messi leh Luis Suarez an awm bakah mawphurhna la zo Xavi leh Andres Iniesta an awm bawk. Hei vang hian Brazil star hian Catalan club-ah mawhpurhna tak tak a la lo.
Brazil coach Dunga-a'n Barcelona forward Neymar chunga innghatin team thar a din a, Santos forward hlui hian coach bakah Brazil mipui laka a mawhphurna a la zo lo. Coach pawhin kum 23 leka upa Neymar chungah rinna a nghat nasa lutuk a, a tifuh bik lo.