Hmeichhe World Cup Germany-in goal an sur tir

Pathianni zing khan Hmeichhe World Cup second round Germany leh Sweden ten an khel a, Swedish hmeichhe team-in German ral lian an dang zo lo.

Inkhel ṭan aṭanga minute 24-na lekah German hmeichhe hoin an goal thun an ṭan a, Anja Mittag chuan top scorer ni tura a dinhmun sawh nghet zelin tun tournament-a a goal ngana a khung. Penalty aṭangin Celia Sasic chuan German goal hnihna a rawn chhunzawm ve leh a, chawlhlawk hmain goal dang a lut tawh lo.

Second half-ah Germany bawkin goal an khung leh a, penalty aṭanga pet goal-tu Sasic chuan minute 78-naah an goal thumna a khung. Sweden-in Linda Sembrant lu hmangin minute 82-naah goal khat tauh lut ve mah se Dzsenifer Marozsan chuan hun tawp nan minute hnih chiah a awm tawh tihin Germany goal lina a rawn khung ve leh a, 4-1 in German hmeichhe team-in hnehna an chang ta a ni.

Germany hian nizana France leh South Korea inkhela chak zawk zak quarterfinal-ah an tum ang. France leh South Korea inkhel hi an result kan hre hman lo.

Coach tel loa chak China

Match khat chhung a naute enkawl thei lo turin China coach Hao Wei hrem nimahse an coach tel loin Chinese hmeichhe hoin an thiamna an pholang a, 1-0 a Cameroon hnehin quarterfinal-an lut.

He inkhela goal awmchhun hi China striker Wang Shanshan chuan minute 12-naah a khung a, Cameroon hmeichhe team-in chhanlet ngei tumin China tlarhnung nawr nasa viau mah se a pawimawh ber goal an khung thei lo a, kum 2011 Hmeichhe World Cup-a inlan pha lo China-in an inlan lehna hmasa berah quarterfinal-an lut ta a ni.

China hian vawiina USA leh Colombia inkhela chak zawk zawk quarterfinal-ah an hmachhawn ang.