Tottenham-ah Burnley defender

Season tharah Burnley-in Championship khel tawh dawn mah se an player ṭha te erawh Premier League khelh chhunzawm turin club lianin an la lut zel.

Burnley right-back Kieran Trippier chuan kum nga chhung cham turin Tottenham Hotspurs a pan a, a man zat hi puanzar a ni lo.

Kum 24-a upa defender hian kum 2012 khan Burnley a zawm a, Turf Moor-a a cham chhung hian match 185 a inlan hman.

Manchester City academy chhuak Trippier chuan Spurs a zawm thei chu a lawmthu sawiin, "Tottenham-in min duh tih ka hriat khan ka inngaihtuah nawn tawh lo. Club lian leh ropui tak a ni a, he hmuna ka theihna pholan hi ka nghakhlel tawh hle a ni," a ti.

Trippier hian season hmasa a Burnley Premier League game zawng zawngah khan bul a ṭan vek a ni.

Tottenham hian tun nipui transfer-ah Cologne aṭangin Austrian defender Kevin Wimmer an lo la lut tawh bawk.