England-in series an la, New Zealand an hawihai

Kumin ICC World Cup-a che chhe tak England leh beisei phak baka che ṭha New Zealnd te'n ODI series match nga an khel a, Inrinni khan final match-ah England-in wicket thuma hnehna changin New Zealand an hawihai.

England-a khelh ODI series-ah hian England-in ṭum danga an la tih theih ngai loh an ti nual a, ODI-a an run siam hnem ber ṭum tawngin an series match hmasa berah run 408 an vawchhuak a, an match linaah an ODI target san ber ṭum tawngin run 349 umin over 44-ah run 350 vawchhuakin an chak leh a, a tawpah 3-2 in series an la ta.

Final match khelh a nih hma hian ram pahnih hi vawi hnih ve ve chakin 2-2 in an inhnehtawk a, final day-a chak zawk zawkin series an la dawn.

Bat hmasa zawkah New Zealand ṭangin over 50-ah run 283 an vawchhuak a, mi pakua an hloh. New Zealand tan World Cup-a che ṭha Martin Guptill bawk a che ṭha a, ball 73 a hmachhawnah run 67 a vawchhuak. Kane Williamson chuan ball 65-ah half century a siam bawk.

England-in an khawtuala series lak ngei tumin an bei na a, an batsman te an che hleithei lo. Mahse, England tan Jonny Bairstow a lo dingchhuak a, ball 60 lek a hmachhawnah run 83 lai a vawchhuak. Over 25 an khel thleng tihin England-in run 192 an vawchhuak tawh a, mi pasarih an hloh. Ruah surin inkhel a tibuai a, DL method hmangin chak zawkah England puan an ni.

Nimin khan India leh Bangladesh-in ODI series second match an khel bawk a, result erawh kan hre hman lo.