FIFA buaina: Sepp Blatter-a'n finfiah a huam

FIFA president kalchhuak tur Sepp Blatter chuan FIFA chhungkuaa inenfiahna leh inzirchianna neih tura ruahmanna awm chu a thlawp thu a sawi.

He ruahmanna hi FIFA executive committee member Germany lam mi Wolfgang Niersbach a ngaihtuah chhuah niin UEFA chuan he ruahmanna hi an lo hnawl tawh niin Blatter chuan a sawi bawk.

Blatter chuan, "German Football Association president Niersbach chuan he ruahmanna ṭha tak hi a rawn ruahman a ni a, mahse association zawng zawng zingah UEFA chiahin he ruahmanna hi a hnar bik a ni. FIFA thar zawk leh ṭha zawk kan sawi ṭhin hi hmu tur chuan kan vaia kan thawh ho a ngai a ni," a ti.

July 20-a Zurich khawpuia FIFA executive committee ṭhukhawm tur chuan he ruahmanna hi an pawm dawn leh dawn loh an ngaihtuah anga, president thar thlanna neih hun tur an ngaihtuah bawk ang.

Blatter chuan, "Confederation-te chu an hruaitu te ṭheuh zirchiang tura beisei an ni ṭhin a, mahse tuna kan ruahmanna ang chuan FIFA ethic chairman te'n uluk lehzualin confederation hruaitu te hi an zirchiang tawh dawn a ni," a ti.

FIFA president aṭanga a ban tur thu puangtu Blatter hi president thar thlan turah amah thlak zo tur khawpa mi ṭha a hmuh loh chuan president dinhmun hi chuh a tum leh anga sawi thuthang awm mah se FIFA chuan hei hi an pha thung.

Blatter chuan, "Tunah hian FIFA hmalam hun chu a inṭan chiah a, FIFA chhungkuaa democracy tih chak lehzual hi kan thupui ber tur a ni," a ti.

Kum 79-a upa Blatter chuan entirnan Asia khawmualpui lachhuakin, "Asia khawmualpui football hruaitu te chiah hi FIFA anga ṭha taka inkaihruai awmchhun an ni. Dan leh dun lekkawh kawngah an tih tur an hre em em a ni," tiin Asian Football Confederation hruaitute a fak.