Depay-a'n harsatna a la tawk dawn - Koeman

Southampton manager Ronald Koeman chuan Manchester United player thar Memphis Depay-a'n Premier League-ah harsatna a tawh chhoh a rinthu a sawi.

PSV champion puitu Depay hi Manchester United-in pound maktaduai 31-in an la lut a, kum 21-a upa Dutch winger hian kum li daih contract a ziak. Season hman zawh takah khan Eredivisie top scorer niin goal 22 a khung.

Saints manager Koeman chuan, "United hian Depay manah hian pawisa tam tham tak an sengin ka hria. Amaherawhchu a la luttute hi United an ni a, Angel Di Maria leh player ṭha dang lak luh nan euro maktaduai 280 seng thei an ni," tiin United-in pawisa an hman tam thu a sawi.

Dutch manager chuan Depay-a harsatna tawh thei tur sawi zuiin, "Di Maria lei nan pawisa tam tham tak an seng a, a khel meuh lo. Chutiang bawkin hlawh tam Radamel Falcao pawh bench-ah an ṭhut tir mai mai bawk. Hei vang hian United tan chuan Depay lak luh nana an pawisa hman zat hi a tam hranpa lo a, bench-a dah an hreh lo ang. Match zawng zawng a khel dawn lo a, ka inkhelh hun lai aṭanga ka hriat chu Dutch player-in Premier League-a khelh ṭhat nghal an harsat tih hi a ni," a ti.

Southampton boss chuan sawi zelin, "Depay hi a ṭha tih kan hria a, ka unaupa Erwin nen agent inang an nei a, Southampton-ah lak luh kan tum hman. Amaherawhchu tun nipuia United an inrawlh tih kan hriat khan kan tan chuan tih ngaihna a awm lo a ni. Depay-a vanneihna chu a coach hriat chian sa Van Gaal-a hnuaiah a awm dawn a, a hmabak khirh lutuk tur a awlsam phah sawt ang," tiin Depay lak luh an tum hman thu a sawi.