Copa America Argentina chak; Messi 100 not out
Inrinni zing khan Argentina chuan Jamaica hnehin Copa America quarterfinal an lut. Lionel Messi-a'n ram tana a match 100 na khelin a team te Group B hmahruaitu nih puiin Paraguay chungah an awm.
Chile-a khelmual pakhat Vina del Mar-a inkhelah hian mipui mit fukna ber chu Barcelona super star Messi a ni a, mah se he inkhela a goal awmchhun khung tu erawh Gonzalo Higuain a ni thung.
Inkhel chu
Argentina manager Gerardo Martino-a'n an inkhelh hmasa a chakna goal khung tu Sergio Aguero aiah Napoli striker Higuain a luh tir a, tlarhnungah Nicolas Otamendi hahchawlh tirin Martin Demichelis a luh tir thung.
Kum 52-a upa manger Martino-a'n a tisual lo, striker Higuain hian minute 11 na lekah he inkhel a goal awmchhun hi a khung. Angel Di Maria siamsak chu nikum October hnua a vawi khat nan an ram tan hian a khung a ni.
World ranking-ah Argentina leh Jamaica inthlauhna hi 62 zet a nih avangin team pahnih hi an inthlau hle a, defender Kemar Lawrence chuan an lama goal tur goal line aṭanga a pet chhuah bakah Di Maria leh Higuain te chuan goal bar an pet per bawk.
Ram tana a game 100 na khel tu Messi hian goal khung lo mah se Jamaica tlarhnung chhaih buaiin ṭum thum zet chu Jamaica goalkeeper Dwayne Miller a rum ṭhaih.
Manager te thu khawchang
A team te quarterfinal hruai thlengtu Martino chuan, "Second half kan inkhel kha a 'boring' tiin min sawisel maithei. Mahse, first half-ah goal kan khung a, thun belh ai chuan humhim kha a pawimawh tawh zawk a ni. Paraguay nen kan inkhelh ṭumin kan tisual tawh a, chuvangin tihsual nawn kan tum tawh lo. Jamaica kha team ṭha tak an ni a, anni laka kan goal kan venghim tluan thei kha a lawmawm hle," tiin a sawi.
Vawi thum inkhelh aṭanga hneh nei miah lo Jamaica manager Winfried Schafer chuan, "Kan khingpui team-ah khan Messi a awm avangin a nihna takah chuan ka naute kha an zam nghal vek tih ka hria. Inkhel bul ṭan fuh lo mah ila goal dang an khung belh tur kan ven theih bakah gaol khungna hun pawh kan insiam thei. Point khat tal hmuh kha chu kan phu a sin le. Beisei angin tournament khel lo mah ila ka naute khelh danah hmasawnna ka hmuh avangin ka lawm tho," tiin a sawi.
Group A aṭang hian hmahruaitu Argentina bakah Paraguay leh Uruguay te chuan quaterfinal an lut a ni.
Ram tan game 100
Kum 28 chauha upa Messi hi Argentina tana game 100 khel tling thei naupang ber a ni a, ani bakah hian Javier Zanetti (144), Javier Mascherano (113), Cholo Simeone (104), Roberto Ayala (114) ten game 100 an lo khel tling tawh. Tun anga a khel chho zel thei a nih chuan Messi hian player dangte record hi a khum vek tur a ngaih a ni.
Tun dinhmunah Messi hian an ram tan goal 46 khung tawhin goal khung hnem ber Gabriel Batistuta chu goal 10-in a la phak lo.
Barcelona forward Messi chuan, "Tun ang kumah game 100 ka khel tling thei hi a mak ka ti a, ka lawm hle. Mahse, a pawimawh ber chu champion nomawi chawi a ni thung. Tun thlengin ka ran tan engah mah ka la champion loh avangin ka hmabak hi ala tam hle in ka hria. Tun ṭumah hian kan beisei ang kan thlen theih ngei ka ring," tiin Copa America champion a tum hle.
Messi hian a club Barcelona tan nomawi chawi theih zawng zawng chu chawi kim vek tawh mah se Argentina tan nomawi ala chawi lo a, nikum FIFA World Cup khan final-ah Germany lakah 1-0 in an vanduai a ni.
A thengtu Chile chak chiang
Group B inkhel dangah Uruguay leh Paraguay te chu goal khat ve ve khungin an inhnehtawk. Atletico Madrid defender Jose Gimenez goal khung hmangin Uruguay hian hmahruai mah se Paraguay striker Lucas Barrios chuan an si phurh a sut ve bawk.
Group A-ah a thlengtu Chile chuan an group match hnuhnung berah Bolivia 5-0 a sawp in group hmahruaitu ni chungin quarterfinal an lut. Chile tan Juventus midfielder Arturo Vidal chu Car-a a chetsual hnu ni thumna lekah minute 45 chhung a inkhel tho a ni.
Chile tan Striker Charles Aranguiz chuan goal hnih a khung bakah Arsenal forward Alexis Sanchez leh Gary Medel te chuan goal khat khung bawkin Ronaldo Raldes chuan anmahni lamah a ti lut palh bawk.
Ecuador pawh chak
Copa America Group A inkhel dangah a vawi khat nan Ecuador chuan Mexico 2-1 a hnehin knockout round an inpet tling bawk.
North America aṭanga khel Mexico coach Miguel Herrera chuan a naute chu chak turin an rilpu an pek tawh loh thu leh an inbausaihna ṭha tawk lo chu he tournamnet a an chet chhian chan niin a sawi.
Mexico hian match thum an khelh aṭangin point hnih hmuin an group-ah a mawngphah an ni.