Local basketball thununtu Khatla TBL
MBBA Season Opening Tournament-ah Khatla TBL an champion. Zirtawpni khan Mizoram Super League champion TBL hian 78-57 in Zarkawt BCA an sawp.
MSL1-ah TBL leh BCA te hi ṭum thum an inkhel a, league stage aṭanga final thlengin Khatla TBL an chak vek. Local basketball-a team ṭha ber chu H. Laldinsanga kaihhruai Khatla TBL an ni.
Season Opening Tournament-ah TBL-in MSL-a an regular player captain Vanlalnunsanga leh Lalrinpuia Hlondo (Papuia) te bakah India team-a tel pha Pratham Singh te an chhawr thei lo a; Zarkawt BCA pawhin captain David Lalruatfela, HT Vanlalremruata, Lalsawmtluanga leh R. Lalfakawma te an hmang thei bik lo.
Player ṭha tel lo hian MSL1 finalist-te hian harsatna nei loin final an thleng a, MSL1 final rematch hi hmuhnawm tura beisei a ni. Amaherawhchu inkhelh hmaa ruah nasa taka a sur avangin BCA player-te an kim tlai a, hei hian thui takin an game a nghawng tel.
Inkhelh ṭan tirh aṭangin Khatla TBL an chungnung zawk a, second quarter-ah TBL-in point 29 lawih an score laiin BCA-in point kua chauh an khung thung a. Zarkawt BCA-in second quarter-a an chet ṭhat loh an tuar a, hun tawp thlengin insiamṭhatna hun an nei tawh lo.
BCA tan Dennis Lalmuanpuia point 18 zet score mah se TBL tan MSL1 best player Mapuia (23 pts), Vanlalmuana (24 pts) leh Gospel Lalthawmmawia (10 pts) te an che ṭha a, Mizoram Super League zawh inelna hmasa bera Khatla TBL an champion nghal hi a mak lo. Tun dinhmuna local basketball club zingah Khatla TBL an ṭha ber.