Ranji Trophy-ah Mizoramin hnehna an chang
India ram chhunga cricket inelna sang ber Ranji Trophy-ah Mizoramin a vawi khat nan hnehna an chang a, nimin khan Sikkim run 78-in an hneh. Mizoram cricket chanchin pawimawh takah hian Luangmual tlangval G. Lalbiakvela a langsar a, man of the match erawh state pawn player Taruwar Kohli a ni.
BCCI hnuaiah
Kum 1992 khan Cricket Association of Mizoram a awm ṭan a, hun rei fe an beih hnuin July 2018 khan BCCI hnuaiah an lut. Mizoramin rahbi thar an zawh a, chutihrualin state dang an el pha lo tih season khatnaah a lang. Ranji Trophy an khelh hmasak ber season-ah hian match riat an khelhah vawi khatmah an chak lo. Season hnihnaah Mizoramin chak ni hmel hmu har mah se an khelh danah hmasawnna a awm. Arunachal Pradesh nena an inhnehtawk ṭum phei chuan first innings-ah thi loin run 620 an siam hial.
Vawi khatna a hlu
Sikkim nen hian January 19 aṭangin an inkhel ṭan a, Sikkim-in vawm hmasak an thlang. Mizoramin Taruwar Kohli century (113) zarah run 201 an siam a, inchhuanna tham a tling lo. Amaherawhchu, bowling-ah Mizoram tan G. Lalbiakvela chuan wicket riat zet a la a, run 56 chauh a pek zarah Sikkim chu run 139-ah an vawm hlum vek.
Second innings-ah Taruwar Kohli (55), KB Pawan (51) leh G. Lalbiakvela (41) te an che ṭha a, Mizoramin run 179 an siam. Sikkim hian chak turin ni hnih chhungin run 242 siam a ngai a, Taruwar Kohli (52/6) leh leh G. Lalbiakvela (69/3) te chet ṭhat avangin an tum ram an thleng lo. Sikkim hian run 163 an siam tihin an thi vek a, Mizoramin a vawi khat nan Ranji Trophy-ah hnehna an chang. Mizoram manager Lalroṭhuama chuan, "Player an khel ṭha rual, a bik takin bowler an che ṭha. Hnehna kan chan hi chu Pathian kaihhruaina vang liau liau a ni," tiin Vanglaini a hrilh.
Cricket Association of Mizoram (CAM) general secretary Mamon Majumdar chu Vanglaini chuan a be pawp nghal. Mamon hi Mizoramin cricket-a hma an sawn theih nana hmalatu pawimawh a ni a, a suangtuahna chuan a tak ram a thlen chhoh ṭan thu a sawi.
“Kan thawhrim rah kan seng ve ṭanah ka ngai. Tun hma aṭangin Ranji Trophy a hnehna chan hi kan lo suangtuah ṭhin a, tunah chuan a takin a thleng dik ve ta. Inelna dangah chuan result nei ve zauh zauh mah ila BCCI lama kan hotute pawhin Ranji Trophy hi an ngaih pawimawh a nih avangin kei ni pawhin he mi atan hian rilru kan pe nasa.Mizoram cricket tan chuan lawmna ni a ni a, kan lawmna tizualtu chu tualchhung player kan neih ṭhatte an che ṭha em em kha a ni. Sikkim laka G. Lalbiakvela chet dante kha a chhuanawm takzet, thawhrim rah vek a ni. BCCI President pawh ka hriattir nghal a, min lawmpui hle. Junior team lamah pawh tualchhung player an che ṭha zel a, anni hi nakin lawkah senior team tana khel tur an ni. BCCI hnuaia season hnih kan hmanna chauh a la ni a, chutihrualin kan khelh dan thlir chuan hmabak kan nei eng ve hleah ka ngai.”
- Mamon Majumdar, Secretary, CAM
Mizoram bt Sikkim
Mizoram run 78-in an chak
1st Innings
Mizoram 201 all out (59.1 Overs)
Kohli 113(152)
Lalhruaizela 30(65)
Iqbal Abdulla 78/5
IH Chaudhary 65/3
Sikkim 139 all out (40 Overs)
Yashpal Singh 44 (61)
A Thapa 33 (38)
G Lalbiakvela 56/8
B Zothansanga 21/1
2nd Innings
Mizoram 179 all out (39 Overs)
T Kohli 55 (72)
KB Pawan 51 (69)
IH Chaudhary 70/5
Iqbal Abdulla 54/3
Sikkim 163 all out (42.2 Overs)
Iqbal Abdulla 37 (48)
C Tamang 26 (50)
T Kohli 52/6
G Lalbiakvela 69/3
Mizoram Team
# Player Khua/Veng
1 KB Pawan Bangalore
2 G. Lalbiakvela Luangmual
3 C. Lalrinsanga Zotlang
4 Lalhmangaiha Dawrpui
5 Lalnunkima Varte Khatla
6 Lalhruaizela Durtlang
7 K. Lalhmingmawia Armed Veng
8 Bobby Zothansanga Chaltlang
9 Taruwar Kohli Jalandhar
10 Lalhruaimawia Bawngkawn
11 Lalruatdika Lalsim Ramhlun South
12 Lalfakzuala Renthlei Chanmari
13 Abhay Ṭhuampui
14 Henry Lalsangzuala Durtlang
15 Darremsanga Laipuitlang
Coaching Staff
16 P.V. Shashikant Bangalore
17 Suhas C. Pawar Baroda
18 Nanda Kumar V Chennai
19 Lalroṭhuama Durtlang