Man United an comeback, hmabak Brighton

Manchester United-in FA Cup-a Arsenal an hneh zawhah Southampton an mikhual a, Premier League table mawngphaha awm Saints an hneh theih nan Amad Diallo-a'n minute 80 hnu lamah hattrick siamin 3-1 in an tho chhuak. Ruben Amorim-a hote hian January 19, Pathianni zan dar 7:30 hian Brighton an mikhual dawn a, Seagulls hi Ipswich Town 2-0 a hneh zo hlim an ni.

Old Trafford mangchhia

Old Trafford-ah Manchester United hmachhawn an harsa ṭhin a, tun hnaiah erawh mualneitu ber hian chak an harsat. Premier League bikah Man United hian match zawnin an mualah Nottingham Forest (3-2), Bournemouth (3-0) leh Newcastle United (2-0) in an hneh lo a, Saints laka an chak lo a nih chuan a zawna vawi li chak lo thei an ni.

Manager thar Ivan Juric hnuaiah Saints inkhel a nung a, mualneitu aiin an goal nawr a ṭha zawk. Andre Onana khnelh ṭhat zarah Saints-in goal an khung lawk lo. Cameroonian keeper hian Kamaldeen Sulemana goal khung tur ṭha takin a dansak a, Onana hian a zawn zatin Tyler Dibling leh Mateus Fernandes te goal khung tur a dang.

United hian chance an nei ve tho a, Alejandro Garnacho-a'n hnai tak aṭangin goal zawnah a pet lo. Chutihrualin khel ṭha zawk Saints-in corner kick an hmang ṭangkai a, minute 43-naah Manuel Ugarte-a'n an lamah an tilut. First half-ah Saints-in goal khatin hma an hruai.

Danglamna thlentu Amad

Second half-ah Saints winger Sulemana a khel ṭha chhunzawm a, United tlarhnung tan a hnawksak hle. Mahse, United an insiamrem a, goal chance an ngah chho. Subsitute Antony-a'n goal ruakah a khung lo a, Bruno Fernandes-a goal khung tur chu keeper Aaron Ramsdale-a'n a dang.

Minute 82-naah Amad a rawn inlar a, Ivorian forward hian mual dinglam aṭanga lalutin goal ṭha zet a khung. Hun tawp thlengin Amad a hmuhnawm zui a, minute 90-naah Christian Eriksen nen inthlawpin Danish midfielder ball chip luh chu a kang laiin a pet goal.

Injury time-ah Amad-a'n Saints defender tihsual leh a thawhrim rah sengin a pet goal leh a, hattrick a siam. Ivorian forward hian season ṭha tak a hmang mek a, Saints an lehthalna kawngah player pawimawh bik a ni.

Man United hian nikum August 24 khan khualmualah Brighton 2-1 in an hneh lo a, Pathianni zanah Seagulls hi an mikhual dawn. Fabian Hurzeler-a hote hian match ruk chhung chak loh an tawng tawh lo a, Arsenal leh Aston Villa thlenga an chelh theih avangin Amorim-a hote tan fimkhur a ṭul ang.