Daniil Medvedev a tla!

Australian Open 2025 mipa champion tura rinkai leh buk rit zinga mi Daniil Medvedev a tla - Russian tlangval hian second round inkhelah, rin hlawh lo zawk Learner Tien chu 6-3, 7-6(4), 6-7(8), 1-6, 7-6(7) in a ngam lo.

Margaret Court Arena-a inkhelah player pahnih an inchai tawk hle, set ngana an khelh laiin Medvedev hian chak turin hun ṭha a nei, 5-5 a nih laia a khingpui service chhuhsakin aman a service zui a, hum ni se la chuan a chak tlang ang.

Mahse, seeded pangana hian ama service a hum thei lo a, tea break an khelh lai pawhin point hniha san fal lai nei mah se a hmang ṭangkai thei chuang lo, darkar li leh minute 48 an khelh hnuah dawhthei leh danglam duh loa khel Learner Tien a dingchang ta zawk a ni.

Inkhel dangah Carlos Alcaraz erawh a chak - Spanish star hian tun tournament atan a vawi khat nan set a hloh a, mahse Nuno Borges chu 6-2 6-4 6-7(3) 6-3 in a hneh ta tho a, fourth round a inhlangkai.

Kum 21 mi Alcaraz chuan, "Australian Open hi ka la champion ngai lohna hmun a ni a, chutiang chung chuan hetiang taka mipui thlawpna ṭha ka dawng hi mak pawh ka ti hial, ka tan chuan a hlu," tiin a sawi a, a vawi nga nan Grand Slam title lak ngei a tum.