Aizawl FC khingpui tur Inter Kashi

I League-ah Aizawl FC-in goal 17 an chhuah tawh a, an tlarhnung a phui loh avangin table hnuai lamah an awm. Mizo club hian zanin dar 7:00 hian champion beiseiawm zinga mi Inter Kashi an hmachhawn dawn a, Kalyani Stadium-a point hlawhchhuak turin tlarhnung tih phui a ṭul hle.

Mizo club leh Edmund Lalrindika telna Inter Kashi inkhel hi Ten Sports 2 aṭangin a en theih a, online hmanga en duh tan SSEN app hmangin a en theih bawk ang. Tun season I League-ah pakhat an relegate dawn a, Mizo club hian table mawngphaha awm SC Bengaluru aiin point khat chauhin an hmu tam.

Aizawl FC hian MPL11-ah nomawi an chawi a, league round match 14 aṭangin goal 10 an chhuah. I League-ah erawh foreigner an neih loh avangin harsatna an tawk a, kuminah match hnih khel tawhin goal 10 an chhuah der.

Victor Lalbiakmawia hna hmasa chu tlarhnung tih phui a ni dawn a, chumi tur chuan team anga an ṭanrual a ṭul ang. AFC khingpui tur Inter Kashi hi an budget a sang a, chutihrualin an match hnunung berah Namdhari 2-0 in an hneh bik lo. Mizo club tan khualmuala point hmuh thil theih a ni.

Nimin tlai khan Churchill Brothers chuan Delhi 2-1 in an hneh a, I League-a top scorer ni mek Wayde Lekay-a'n goal a khung chhunzawm zel. Goan club hian match kua aṭangin point 19 an hmu a, hmahruaitu an ni mek.