A tawp lama par chhuangtu Real Madrid

Copa del Rey round of 16-ah Real Madrid-in goal nga ngawt an khung a, 5-2 in Celta Vigo lakah an chak - scoreline en ang mai erawh a ni lo a, Carlo Ancelotti naute hian hnehna chang turin extra time an mamawh!

Real hian Kylian Mbappe leh Vinicius Junior hmangin 2-0 in hma an hruai a, an chak mai dawn emaw an intih laiin Jonathan Bamba leh Marcos Alonso hmangin si phurh an sut a, extra time khelh a ngaih phah.

Mahse, extra time-ah Real-in an zia tak tak an pholang a, Endrick chuan goal hnih khungin, Federico Valverde chuan goal khat a khung bawk a, Madrid khaw club-in 5-2 a hnehna changin, Copa del Rey quarterfinal an lut.

A tirin Real

Santiago Bernabeu-a inkhelah Real-in harsatna an tawk dawn lo niin a lang a, minute 37-naah Mbappe chuan goal hmahruai a khung - French striker tan tun season inelna hrang hranga goal 16 a khungna chiah a ni a, amah sawiseltute khelmualah a chhanglet zel.

First half chhungin goal dang lut lo mah se, second half ṭan aṭanga minute thumna lekah Real-in an khung belh a, a khungtu chu Vinicius Junior a ni - Brazilian forward hian tun season inelna hrang hrangah goal 14 khungin assist vawi 10 a nei tawh.

Team pahnih player neih dan thlirin, Real hi nuamsain an chak dawn niin a lang hman a, mahse, Celta-in ngaihdan dang an nei - minute 83-naah Jonathan Bamba chuan Celta tan si phurh a rawn sut ṭhen a, an phur sawt.

Hmangaih hmasa

Bamba goal khung hnuah Celta Vigo an phur thar a, hun pek belhah goal khungtu Bamba hian penalty a hlawh chhuak zui - a pet turin Alonso a lo pen chhuak a, boruak sang tak hnuaiah a hlah lo.

Marcos Alonso hian Chelsea-ah pawh hming lo chher tawhin, English club-ah season ruk zet a khelh hnuin, 2022-23 season khan Barcelona panin a chhuak a, season hmasa thleng kha Catalan club tan a khel.

Spanish fullback hian tun season-ah Celta Vigo a zawm a, a club thar tana a goal hmasa ber chu amah chher hriamtu Real lakah a khung - Alonso hi Real academy chhuak a ni a, senior team tan erawh match khat chiah a khel hman.

Danglamna Endrick

Hun pek belhah Celta-in si phurh an sut zo a, an phur hman viau. Mahse, Real tan minute 79-naa Mbappe thlaktu, rawlthar tha za Endrick a inlan a, Celta-in Brazilian forward hi an chelh ngang lo.

Kum 18 mi forward hian minute 108-naah hmahruai nawnna goal a khung a, Federico Valverde chuan minute 112-naah belhchhahin, hun tawp nan minute khat chiah a awm tawh Endrick hian a hnu a khar zui.

Thawm nei hata Real pantu, kum 18 lek ni chunga Brazil tana vawi 13 inlan thei Endrick hian Real a pan hnuah beisei a phak loh avangin sawisel a tawk nasa - tunah goal hnihin amah sawiseltute a chhanglet a, tun season-a match 17 a khelha goal li a khungna chiah niin, a goal hnih khan inrintawkna a pe ang.

Madrid tan lawmna

Real boss Carlo Ancelotti-a'n 2-0 a nih lain substitution a siam nual a, Eduardo Camavinga, Valverde, Endrick leh Arda Guler te a luhtir a, goal hnih an chhuah leh si! King Carlo hian a hahdamtir Jude Bellingham leh Rodrygo a luhtir leh hial.

Mahse, hun a tawp meuh chuan bench aṭanga luhtir player-te thoin danglamna an thlen a, Endrick-a'n goal hnih khungin, Guler siamsak ve ve a ni a, Valverde-a'n goal khat a khung bawk - kum 19 mi Guler hian tun season-ah match 22 khelin goal thum a khung a, assist vawi li a nei.

Rel hi Spanish Super Cup final-a Barclona-in an sawp hlim a ni a, Barca an ngam lohna scoreline ang chiahin an chak - Ningani zan result hian inrintawkna thar a pe ang tih a chiang a, Pathianni zan dar 8:45-ah league match khel turin Las Palmas an mikhual zui ang.