Champion lai Bilbao an tla

Copa del Rey-ah champion lai Athletic Bilbao chu round of 16-ah an zinkawng a tawpa, mikhual Osasuna lakah 3-2 in an tlawm. Ningani Zan inkhelah Osasuna hian 2-0 in hma an hruai hman a, Aimar Oroz leh Ante Budimir (penalty) ten goal an khung.

Mahse, first half hun pek belhah Nico Williams chuan si phurh sut ṭhenin, minute 55-naah Oscar de Marcos chuan si phurh a sut zo a, beiseina an nei thar - beiseina an neih chhung erawh a rei lo a, Ante Budimir chuan minute 70-naah chakna goal khungin, champion lai an pet chhuak.

Season hmasaa semifinal lut Real Sociedad pawhin a thiam pariat zingah an hming an ziak kai a, 3-1 in Rayo Vallecano an hneh. Sociedad tan Mikel Oyarzabal, Jon Ander Olasagasti leh Sergio Gómez ten goal khat ṭheuh an khung.

Oscar Trejo-a penalty chu Vallecano tan scoreline cheimawina bak a tling lo; 2-1 a an hnufual laiin fullback Alfonso Espino hnawhchhuah a ni a, Vallecano tan a harsa sawt tiin a sawi theih.

Copa del Rey quarterfinal-a inhmachhawn tur chu Thawhṭanniah draw neih a ni dawn a, Real Madrid, Osasuna leh Sociedad hma hian Barcelona, Atletico Madrid, Valencia, Leganes leh Getafe te chuan a thiam pariat zingah an hming an lo ziak kai tawh.