Osaka inkhel tluan thei lo

Australian Open vawi hnih champion tawh Naomi Osaka chuan nimin khan third round a khel a, beiseiawm takin inlan mah se a pum na vangin inelna a hmachhawn zui thei lo.

Melbourne Park-ah Osaka hian Belinda Bencic a hmachhawn a, fa a neih hnuah Grand Slam third round a khelh lehna hmasa niin amah pawh a phur, mahse set khatna 4-1 a hma a hruai laiin a pum a na.

A taksa a nuam lo zui a, 6-5 a nih laiin damdawi lam thiamte enkawl lailawkna a mamawh hial, set khatna tie break chu khel zui hram mah se a khel zo thei ta lo a, tui tak chungin inelna a mangṭha a ngai.

Olympic champion hlui Bencic chuan, "Naomi dinhmun kha ka hriatthiampui, set khatna kan khelh tawp lamah khan harsatna a nei, hliam leh natna nei chunga tournament khelh tluan theih loh hi chu thil hrehawm tak a ni a, pawi ka tih pui takzet," a ti.

Inkhel dangah Aryna Sabalenka chuan hnehna a chang, champion lai hian Clara Tauson chu 7-6(5), 6-4 a hnehin fourth round a inhlangkai a, a match lehpekah chuan seeded 11-na Mirra Andreeva a hmachhawn leh ang.