Christensen a lo kir hnai

Barcelona centre back Andreas Christensen chu thla nga zet a ke hliam avanga a chawlh hnuin a lo kir hnai a, zanin dar 1:30-a Getafe an hmachhawn hunah squad-ah a awm tawh beisei a ni.

Danish defender hi tun season-a an match hmasa berah Valencia nen inkhelin, a inhliam nghal a, zai a ngai hial. Catalan club hian hralh mai an pawiti lo ang hiala sawi a awm hman a, mahse, tuna a lan dan chuan a chhuak leh dawn lo niin a lang.

Spanish Super Cup final inkhelah centre back pakhat Inigo Martinez a inhliam a, thla khat tal a chawlh a ngaih hmel - hetiang boruak kara Christensen lo kir tur thu hriat hi Barca tan thu lawmawm a tling.

Barcelona hian season bul ṭan ṭha viau mah se, an league match hnuhnung pasarihah vawi khat chiah an chak a, league hmahruaitu aṭangin pathumnaah an tla thla hman a, champion an tum chuan league lamah pawh harhtharna an chan a ṭul.

Catalan club hian kum 2025 an ṭan ṭha rih viau - league match la khel lo mah se, Copa del Rey leh Supercopa de Espana lamah match li khelin an chak vek a, Copa del Rey-ah quarterfinal lutin, Spanish Supercup-ah champion nomawi an chawi bawk.