Mumbai-in point hlawh hram

Ningani zan Indian Super League inkhelah point khat hlawh chhuak turin Mumbai City-in vanneihna an mamawh a, minute 58-naa Nikolaos Karelis-a goal hmangin point khat an hlawh chhuak hram.

Mumbai hian khualmualah captain Lallianzuala Chhangte tel loin Punjab FC hi an lenchilh a, Lunglei tlangval hian Ramhlun North, Aizawlah gym thar 'Flashfit' a hawn avangin a team a zawm hman lo.

Punjab hian an goal khung khawl Luka Majcen hmangin goal an lo khung hmasa a, first half hun pek belhah goal hmahruai an khung. Mahse, goal dang an khung zui thei bik lo a, Greek forward Karelis-a'n si phurh sutna goal khungin, team pahnih hi 1-1 in an inhnehtawk.

Mumbai hi table-ah parukna niin, semifinal luh beiseina thlengin a la nung a, table-a pariatna dinhmun luahtu Punjab FC tan beisei a la bo bik lo.

Ningani zan inkhelah Mumbai tan mimal thil avangin LZ-a inlan thei lo mah se, Hmingthanmawia Ralte (Valpuia) chuan inkhel bul a ṭan.