Dkojovic hmachhawn tur Alcaraz

Novak Djokovic chuan Jiri Lehecka hnehin Australian Open quarterfinal a lut, nimin tlai inkhel hmuhnawm takah Serbian star hian 6-3, 6-4, 7-6 (7-4) in hnehna a chang.

Rod Laver Arena-a inkhelah, kum 37 mi Djokovic hian darkar hnih leh minute 39 chhungin hnehna a chang, a match lehpekah chuan champion tura rinkai zinga mi Carlos Alcaraz a hmachhawn dawn a ni.

Australian Open a nih tawh chuan rilruah Djokovic a lo lang nghal ṭhin, vawi 10 a champion tawh avangin sulhnu a nei ṭha fal hle - season hmasa erawh kha chuan a champion lo.

Kuminah hian coach atan Andy Murray a ruai a, player a nih laia a lo hmachhawn fo tawh Muray hi tunah chuan thurawn petu a ni tawh, player ṭha tak tak rawn chhuak thar kara champion an chak khawp ang.

Nimin inkhel dangah Alexander Zverev chuan a khingpui Ugo Humbert chu 6-1, 2-6, 6-3, 6-2 in a hneh a, harsa lutuk loin Australian Open quarterfinal a invaw kai.

Seeded pahnihna Zverev chuan, "Grand Slam ka khelh tawh zingah chuan a kar khatna a fuh ber ṭum a la ni ang, inelna tir lamah tha ka seng hnem ṭhin, tun ṭum erawh ka khel fuh chho hle," a ti.

German tlangval hian match li a khel tawh, a hmasa pathumah set a hloh miah lo - Humbert hneh tur pawhin darkar hnih leh minute 16 chauh a hmang, a match hmabakah Tommy Paul nen an inhmachhawn leh ang.

Margaret Court Arena-a inkhelah Paul a chak ve thung a, darkar khat leh minute 27 chhung lekin a khingpui Alejandro Davidovich Fokina chu 6-1, 6-1, 6-1 in a hneh a, Zverev hmachhawn turin a inpeih.