Arsenal an tawlhthlu leh ta

Hun tawp dawna an goal khung an pawm lo a, lungawi lo chungin point khatah an lungawi a ngai - Arsenal chu Premier League nomawi inchuh boruak san lai takin an chesual, an tan champion a harsa leh dawn ta sawt.

Unai Emery-a'n amah thlaktu Mikel Arteta tan kawng awlsam a pe ngawt duh bik lo, season hmasa pawh khan Gunners kawng hi a lo dansak tawh, tun ṭumah pawh 2-2 a inhnehtawkin Liverpool chu dinhmun ṭhaah a dintir.

Inrinni zan Emirates Stadium-a inkhelah Arsenal tan Gabriel Martinelli leh Kai Havertz ten goal khungin an dinhmun a ṭha hman hle, mahse second half-ah Villa lamin Youri Tielemans leh striker Ollie Watkins te hmangin an sut zo.

Tlarhnung pawp

Mualhma lam sirah Leandro Trosspard a hmuhnawm, a awmna lam aṭangin ball hlauhawm a chhuak fo - Belgian forward hian Martinelli tan a siamsak hmasa phawt a, chumi hnuah Havertz a siamsak leh bawk.

Martinelli-a khung tur hi keeper Emi Martinez chuan beng chhuak hmanah a inngai, mahse goal line a lo pel hman; Havertz pawhin awmna tur hmun thlang dikin goal a khung, tunlai a boruak tawh nen thawk huaina tham a ni ang.

Mahse, coach tawnhriat nei ṭha Emery leh a naute an beidawng duh bik lo - William Saliba awm lohna Gunners tlarhnung an rumṭhaih thei deuh reng a, Tielemans leh Watkins te chu dan reng theih pawh an ni ta lo.

Saliba hmunruak luah tura dah Jurrien Timber tan Gabriel nena inkawp a awlsam lo a, midfielder Thomas Partey hi defender a ni lo tih a lang leh ṭhin bawk, coach Arteta-a'n defender Jakub Kiwior nei reng chung sia a thutlukna dik lo an tuar.

Nomawi a hla

Season hmasa khan Arsenal hian hun pawimawh lai takin Aston Villa an lenchilh a, an chak loh avangin nomawi beiseina a zuih - kuminah pawh thawnthu a danglam chuang lo, anmahni mualah ngei an chak zo lo.

Arsenal hian Premier League match 22 aṭangin point 44 an hmu a, chunga awm Liverpool an phak lohna chu point ruk a ni - Reds hian match khata an khelh tlem zawk avangin an inkar hi a la zau belh thei.

Arteta chuan, "A chang chuan chak lo zawk thei dinhmuna kan din hnua thawh chhuah leh chang kan nei, tun ṭumah erawh kan lamah vanneihna a ṭang lo," a ti a, hun tawp dawn lama Havertz goal khung an pawm loh chu an ui tih a sawi bawk.

Thlasik bazar lai a ni a, player an lai dawn leh dawn loh zawhna chhangin Arteta chuan, "Inkhel pakhat result avanga thutlukna siam tur kan ni lo, chutihrualin team dang nen kan bench hi khaikhin ta ila kan tlem deuh chu a ni," a ti.