Carlos Alcaraz a vannei

Australian Open mipa inelna huangah Carlos Alcaraz chuan fourth round a lut, nimin chawhnu lam khan Alcaraz hi Jack Draper nen an intawng a, set hnih an khelh zawh hnuah Draper hi hliam vangin a khel chhunzawm thei lo.

Seeded pathumna Alcaraz hi chak tura rinkai zawk a ni, set hmasa pahnih pawh 7-5, 6-1 in a la. Draper hi a khel bawr a hliam a, a inkhel chhunzawm thei lo - Rod Laver Arena chhunga inkhel entute chu zahna chibai buk chungin a chhuahsan.

Alcaraz tan darkar khat leh minute 35 chhung leka chak theih hi thil lawmawm a ni, tun kar chhungin round sang zawk an khel chhunzawm dawn a, inelna tir lama thahrui hman tam loh hi chanchin ṭha a ni.

Kum 21 mi Alcaraz chuan, "Round sang zawk thlen hi thil lawmawm tak a ni a, chutihrualin kan khingpuite an hliam avanga chak zawk nih erawh lawm a kim lo deuh ṭhin, infiammi tan chuan hliam neih hi a pawi," a ti.

Champion lai Jannik Sinner a la kaltluang zel, world number 1 Sinner hian seeded chang phak lo Marcos Giron chu 6-3, 6-4, 6-2 a hnehin Australian Open fourth round a lut a, nomawi kawl lai humhim turin kawng dik a zawh.

Rod Laver Arena hi Sinner tan chuan hmun nuam a ni a, a che buai lo lehpek hle. Italian tlangval hian Grand Slam huangah American mi a hmachhawn hnuhnung 14 chu a ngam vek tihna a ni, inrintawkna pawh a nei sang hle.

Winners vawi 35 vaw chhuaktu Sinner chuan, "Match tin mai hian kalhmang leh khelh dan tur hran hi a nei vek a, harsatna leh nawmna lai pawh a nei ṭhin. Giron-a service lo vuak let kha harsa ka ti ṭhin a, a tir lamah phei kha chuan ka buai hle, a hnuah erawh ka insiamṭha," a ti.

World number 1 Sinner hian a match lehpekah chuan Holger Rune a hmachhawn leh ang. Seeded 13-na Rune hian inkhel dangah Miomir Kecmanovic chu 6-7 (5), 6-3, 4-6, 6-4, 6-4 in a hneh, inelna neih laiah match thum khel tawhin chung zinga pahnihah chuan set nga a khel.