Atletico tlawm zanah Barca chak zo lo
Club record siam a, inelna hrang hrangah match 15 zet a zawna an chak hnuin Atletico Madrid an tlawm ve ta a, an mikhualna ramah Leganes chu 1-0 in an ngam lo!
La Liga hmahruaitu Atletico-in khualmualah an beisei loh result an hmu a, Leganes tan Matija Nastasic chuan inkhela goal awmchhung a khung - Antoine Griezmann-a'n penalty a hlah thung.
Atletico chak zawh loh thu hre sain Barcelona an inlan a, an chak zo lo ve leh ringawt - Getafe lakah Jules Kounde hmangin goal hmahruai khung mah se, Mauro Arambarri chuan Getafe tan si phurh a sut.
An tlawm ta
October 27-a Real Betis laka an tlawm hnua la tlawm leh lo Atletico-in Leganes khelmuala tlawm an inbeisei kher lo ang - mahse, football hi beisei anga thil a thlen vekna hmun a ni bik lo!
Khualmualah Atletico an vanduai - first half inkhela goal a luh hmain Julian Alvarez leh Griezmann ten goal khung theihna remchang nei mah se, woodwork an tihper ve ve.
Second half ṭan aṭanga minute linaah Leganes-in an hrem nghal a, centre-back Matija Nastasic chuan goal a khung. Atletico hian hun tawp lamah si phurh sutna remchang penalty hmangin an nei zui a, mahse, thiampuipa Griezmann chuan a hlah tlat!
Barca an buai
Hansi Flick-a enkawl Barca-in an match hnuhnung pahnihah goal nga ve ve an khung - Spanish Supercup an champion a, Copa del Rey quarterfinal an lut bawk. Inrinni zan an thawnthu erawh a danglam leh ta.
Barca hian minute kuana lekah Koundé hmanga goal an khung avangin beiseina an nei sang hman a, mahse, Getafe tan Arambarri chuan si phurh sutin, goal dang a lut tawh lo.
Real Madrid duh ang thlapin thil a thleng a, anni hian nizan khan Las Palmas mikhualin an result kan hre hman lo - he thu buatsaih lai hian Atletico chu La Liga hmahruaitu an la ni a, nizana Real result a zirin a danglam leh ang.