Bayern leh Leverkusen inum zel

Bundesliga-ah champion tur inum boruak a hot zel. Champion lai Bayer Leverkusen-in Borussia Monchengladbach 3-1 in an hneh a, hmahruaitu Bayern Munich-in Wolfsburg 3-2 in an hneh ve bawk.

Allianz Arena-ah Bayern-in nung takin bul an ṭan a, Leroy Sane-a'n chance ṭha hmasa hlah mah se Leon Goretzka-a'n minute 20-naah box pawn aṭangin a khung. Wolfsburg lamin Mohamed Amoura hmangin minute 24-naah siphurh sut mah se Michael Olise hmangin minute 39-naah Bavarians-in hma an hruai nawn. Wolsburg keeper Kamil Grabara-a'n a tihtur a ti lo.

Second half-ah Goretzka-a'n tauh lut. 3-1 a nih tawh avangin Vincent Kompany hote dinhmun a ṭha. Mahse, Bavarians-in goal an khung belh thei lo. Amoura-a'n minute 88-naah Wolfsburg siphurh a sut ṭhen a, mual neitu nuam sain an chak lo.

Leverkusen erawhin Monchengladbach hneh turin harsatna an tawk lo a, Florian Wirtz-a goal hnih leh Patrik Schick goal khat hmangin goal thum an khung. Hun pek belhah Tim Kleindienst-a'n Gladbach tan a khung a, 3-1 in inkhel a tawp.