Milan hnehtu Juventus

Juventus chuan Inrinni zan Serie A inkhelah an mikhual AC Milan chu 2-0 in an hneh a, an elpui an ngam avangin Serie A table sang zual pali zingah a inhlangkai, an dinhmun erawh midang inkhel result a zirin a la danglam leh thei.

Hmahruaitu Napoli pawh an chesual duh lo - Antonio Conte naute hian goal chhuah hmasa mah se Atalanta chu 3-2 in an hneh let a, a chung berah an awm chhunzawm, nomawi an beiseina an chhi nung zel.

An khingpuite nen an inhnehtawk ngun em avangin Juventus hian sawisel an hlawh. Allianz Stadium-a inkhelah pawh chawlhlawk hmain goal an khung lo, mahse second half-ah Samuel Mbangula leh Timothy Weah te hmangin an khung.

Juve manager Thiago Motta chuan, "Hnehna chan tum hian ni tin kan inbuatsaih ṭhin a, a rah chhuah chu kan hmu ta. Ka naute hi an thawkrim em em a, harsa tak chunga chak hi chu a hlu zual ṭhin," tiin a sawi a, champion erawh a la sawi ngam lo.

Milan manager Sergio Conceicao erawh a lungawi lo - Conceicao chuan, "A tir lamah kha chuan kan inkhairual ṭha hle a, goal khung theihna remchang pawh kan nei hnem zawk, goal hnih kan chhuah dan kha a ho lam deuh," a ti.

Milan hian Serie A match 20 aṭangin point 31 an hmu a, table-ah pariatna an ni mek; hmahruaitu Napoli an phak lohna chu point 19 lai a ni tawh a, match khatin khel tlem mah se an tan league champion beisei ngam a harsa tawh ang.

Napoli erawh hma lam panin an kal zel - Atalanta mualah Matteo Politano, Scott McTominay leh Romelu Lukau te goal hmangin 3-2 in an chak. Coach Conte chuan, "Harsatna hi chu a lo thleng ṭhin dawn.

"Eng pawh hmachhawn thei tura kan inpeih hi a pawimawh lai chu a ni, goal chhuah loh theih hi duhthusam a ni, chutihrualin kan chhuah a nih pawhin ṭha taka beih let chu kan hna a ni," a ti.