PSG an tho chhuak hram

Goal an phurh hmasak hnuah Paris Saint Germain chuan Lens 2-1 in an hneh let a, Inrinni zan khan coach Luis Enrique chuan inkhel harsa takah an chak hram tih a sawi.

Mualneitu Lens tan M'Bala Nzola chuan minute 36-naah goal a khung a, chawlhlawk laia hmahruaitu an ni chhunzawm. Ligue 1 champion PSG lamin Fabian Ruiz hmanga an sut bakah, hun tawp dawnah Bradley Barcola chuan chakna goal a khung.

PSG manager Luis Enrique chuan, "Mikhual team zawk hi chu a awlsam ngai lo, a bik takin tun ṭum kha chu inkhel thunun a harsa takzet, ball hloh kan ngahin tihsual dang pawh a tam.

"Chutihrualin, match hautak kan paltlang hi chuan inrintawkna kan neih belh phah ṭhin. Lens laka kan khelh dan pawh kha Champions League atan inbuatsaihna ṭha tak a ni," tiin a eng zawngin thil a thlir.

PSG hian Ligue 1 match 18 aṭangin point 46 an hmu a, table hmahruaitu niin an champion leh mai pawh a rinawm. Club neitu lamin an duh tak Champions League erawh an la hlat rih a, last 16 lut tur pawhin an tan kawng a harsa dawn.

Luis Enrique naute hian Nilaini zan dar 1:30 hian UCL match khel turin Manchester City an lo mikhual zui dawn a ni.