I Day Football 2016 Chanmari hmaah Ramhlun North

Vawiin chawhnu dar 2:00 hian, I Day Football semi final-ah Chanmari FC leh Ramhlun North FC chu Lammualah an inkhel dawn a,

I Day Football-ah Chanmari FC-in nung takin bul an ṭan a, an khingpui tur Ramhlun North erawhin thawm nei lian nghal lo mah se group stage a zawh meuh chuan hma an sawn tih a hmuh theih - MPL champion tawh leh MPL kai thar an insu dawn - en man Rs 30/- a ni.

Ramhlun N an ṭha zawk

I Day Football group stage-ah Ramhlun North-in ṭantu an nei ṭha ber a, Chanmari FC-in an tluk lo. Semifinal-ah MPL-a ṭantu nei ṭha ṭhin Chanmari an harh thar a nih ngawt loh chuan tun dinhmunah Ramhlun North-in ṭantu an nei ṭha zawk.

Ramhlun North coach Lalruatliana Sailo (Tawia) chuan, "Mipui hi kan tan a pawimawh a, kan team chakna hnar an ni. Chanmari FC kan hmachhawn hunah hian ṭha lehzuala min
ṭawiawm a ṭul a ni," tiin a sawi.

Chanmari coach Lalsang-zuala Hmar chuan, "Ramhlun North hian ṭantu an nei ṭha a, Chanmari FC hi MPL ṭantirh aṭanga ṭantu nei chhe ngai lo an ni thung. Semifinal-ah pawh hian Lammualah Chanmari
ṭantu chuan an tihtur ṭha takin an rawn hlenchhuah ka ring," tiin an club ṭantute a fak.

Ven ngai Fela leh Sawmfela

Chhinga Veng lama goal ro-pui khungtu Malsawmfela'n hrem vanga AIFF Academy a hmachhawn theih loh hnuah Ramhlun North hmachhawn turin a rawn kir dawn.

Chan-mari FC tlar hmaa Sawmfela kawppui Republic Vengthlang tlangval Lalruatfela Zote pawh ven uluk a ṭul khawp ang. Coach Sanga hian Mizo winger hmabak nei êng Lalmuanzova, Vanlalbiaa Chhangte, Ṭhasiama leh Isaac Lalruatpuia te an kawl a, BVT captain hlui Lalrammawia an kawl bawk avangin Ramhlun North lakah hian goal an khung ngei a rinawm.

Ramhlun North hian hrem vangin defender Lalruatfela an chhawr thei dawn lo a, C. Ramdinmawia a dam leh tawh avangin Lawngtlai defender inhliam hi an tuar hran lo ang.

Zawhna awm erawh Chanmari game rang tak hmachhawn turin an ṭha tawk em, tih hi a ni. Tawia hote tana lawmna tur chu Chanmari game siamtu R. Malsawmtuanga hrem vangin a la inlan thei lo.

Attacking Football

Chanmari FC-in attacking football an khel ṭhin tih sawi nawn a ngai lo a, Ramhlun North coach Tawia pawhin chak duh luat avanga mipui nin tur khawpa draw game khelh a duh loh thu a sawi bawk.

MPL kaithar hian an match hmasa bera Zo United nen goal awm loa an inhnehtawk hnuah match thum a zawnin goal an khung tawh a, tlar hnung lamah pawh ball an inpek ngam avangin player langsar kawl lo mah se an huaisen hle.

Amaherawhchu Ramhlun North hian Bethlehem VT lama goal khungtu B. Malsawmzuala hrem vangin an chhawr thei dawn lo a, Chanmari player hlui Vanlalthlamuana chu an innghahna tur a ni.

MPL kaithar hian Chanmari tlar hnung sut tlang hmain khel ṭha thei tak midfielder Lalrinchhana an paltlang phawt a ngai a, Electric Veng tlangval an su tlang a nih pawhin captain Lalrinchhana Tochhawng kaihhruai tlar hnung sut hawn chu a har khawp ang.

Vawi--in hian Chanmari FC-in Lalmuanawma hrem vangin chhawr thei dawn lo mah se Santosh Trophy player MS Dawngzela (Notea) te an la nei cheu.

Eng nge an sawi?

Ramhlun North coach Tawia chuan, "Chanmari FC hian hming nei lian zawk mah se kan rilru a buai phah lo. Keini chuan pen khat zela hmasawn hi kan tum a, huaisen taka match khat zel hmachhawn hi kan duh dan a ni. Knockout stage a nih avangin draw game khelh kan tum lo a, minute 90 chhunga chak ngei tumin kan khel ang," tiin a zam lo.

Chanmari FC boss ve thung chuan, "Group B hi team ṭha lo zawk niin an sawi a, amaherawhchu Dinthar FC, BVT leh Zo United te hi team
ṭha an ni. Heng team ṭha patlang thei Ramhlun North hi an chhe lo a, hneh tur chuan kan ṭan a ngai khawp ang," tiin team ṭha zawkah a inchhal duh lo.