US tan Ledecky a vul zel

Rio Olympic neih meka hming langsar ber tia sawi ngam ni mek chu Katie Ledecky a ni. United States tleirawl hian an ram tan 200m leh 400m freestyle bakah 4x200m freestyle relay-ah hnehna changin gold pathum a la der tawh!

US tan Ledecky bakah Allison Schmitt, Leah Smith leh Maya Dirado te an inlan a, minute sarih leh second 43.03 hun hmangin pakhatna an ni a, pahnihna chu Australia niin Canada chuan pathumna dinhmun an luah bawk.

Hmeichhe 4x200m freestyle relay-ah hian US hi an che ful nghal mai bik lo a, last leg-ah kum 19-a upa Ledecky chuan Australia nula Tamsin Cook hleuh pelin hnehna an chan phah a ni.

Washington, D.C. a piang Ledecky hian 2012 London Olympic-ah khan kum 15 chauha upa ni chungin 800m-ah gold medal a lo dawng tawh bawk a, naupangte ni chungin infiamna huangah erawh hming langsar leh ropui a ni tawh. Rio-ah hian 800m-ah a la inlan leh ang.