Everton defender thar Ashley Williams

Premier League club Everton chuan Manchester City laka an central defender John Stones an chan hnuin a thlakna tur an lalut ve lehnghal a, Swansea City captain Ashley Williams chu season thum chhung atan contract an ziahpui.

Kum 31-a upa defender man zat hi puanzar ni lo mah se Welsh club hian Everton-in pound maktaduai 10-a an dawrna chu an lo hnar tawh avangin pound maktaduai 12 bawr vel ni tura ngaih a ni.

Merseyside club manager thar Ronald Koeman-a'n transfer bazar-ah player pathum a lakluhna a ni a, Wales captain Ashley hma hian Senegal midfielder Idrissa Gueye leh goalkeeper Maarten Stekelenburg te chu a lo lalut tawh.

Euro 2016 khelh zawh taka semifinal thlenga Wales kaihruaitu defender chuan, "Everton hian kawng dik an zawh mek a, manager Koeman hi Goodison Park ka pan chhan pakhat a ni. A hunlaia central defender ṭha ber pawl a ni a, a hnen aṭang hian tam tak zir tur ka nei dawn a ni," a ti.

Wales tana vawi 65 inlan tawh defender hian kum 2007 khan Stockport ṭangin Swansea hi £300,000-in a zawm a, kum riat a khelh chhunga match 352 inlan hmanin League One, Championship leh Premier League-ah te Wales club tan hian a khel hman a ni.