League Cup Liverpool hmachhawn tur Burton

England-a football league club hrang hrangte inelna League Cup tia hriat ṭhin English Football League Cup (EFL Cup) chu league hniam lam club-ten khel tawhin second round khelh a ni leh tawh dawn a, second round-ah hian Europe-a inlan phak lo Premier League club 13-ten an zawm ve dawn.

Season hmasa League Cup finalist Liverpool-in Europa League takngial pawh an khelh phak loh avangin second round-a bul an ṭan a ngai a, Jurgen Klopp-a naute hian an EFL Cup match hmasa berah August 23 khian Championship club Burton Albion an hmachhawn nghal dawn a ni.

Chelsea chuan Bristol Rovers leh Bristol City-ah an hmachhawn tur zawk a la chiang lo a, Dutch manager Ronald Koeman enkawlna hnuaia insiamṭhat tum mek Everton kalkawng a awlsam nghal dawn a, League Two club Yeovil an hmachhawn ang.

EFL Cup?

Season hman zawh tak thleng khan EFL Cup hi League Cup tia hriat lar ṭhin a ni a, sponsorship hming chawiin Capital One Cup tih ṭhin a ni bawk. Mahse, sponsor aṭangin Capital One an inhnukdawk a, Football League tia hriat ṭhin chu English Football League tia thlak a lo nih tak bawk avangin tun season aṭangin EFL Cup tih a ni tawh dawn a ni.

Inlan tur

EFL Cup first round-ah club 70 ten bul ṭanin League Two (club 24), League One (club 24) leh Championship (club 22) an inlan a, vawi khat inkhelha chak zawk ṭheuhin second round an lut.

Second round-ah hian season hman zawh taka Premier League aṭanga relegate 18 &19-na club bakah Europe-a inlan phak lo Premier League club 13-te chu tling sa an ni a, first round aṭanga inhlangkai club 35 te nen third round luh an inchuh leh ang.

Third round-ah hian Premier League club Europe-a inlan pasarihte chu tling sa an ni a, second round aṭanga inhlangkai club 25-in zawm ve lehin an vaiin club 32 an inel ang a, club chak zawk ṭheuhin last 16 an lut dawn a ni.