Novak Djokovic a chawl dawn

World number 1 Novak Djokovic chuan karleha khelh tur ATP Masters Series Cincinnati Open-ah a inlan loh tur thu chu Nilaini khan a sawi chhuak.

Kum 29-a upa Djokovic hi Wim-bledon title a hloh hnuah Rio Olympic first round-ah Argentina tlangval Juan Martin del Potro hneh loin a tla a, tunah chuan a banrek enkawl a duh avangin a chawl rih dawn a ni.

Serbian thiampuipa Djokovic chuan, "Cincinnati-a ka inlan theih loh tur thu sawi hi thil nuam tak a ni lo. Kuminah ka inkhel hnem a, ka taksa a chauin a bik takin ka ban rek hi enkawl a ngai," a ti.

ATP Masters Series-ah chuan tun hnai bikah chuan Djokovic hi a chung-nung hle a, a inlan hnuhnung vawi 14 aṭangin ṭum khat chiah final luh loh a nei. Olympic hma chiah khan Rogers Cup-ah champion-in Masters title 30 a la tling chiah bawk.

Djokovic chuan, "ATP Masters Series-a ka la champion lohna hmuna ka inlan lo tur hi a pawi ka ti a, hun ṭha ka la neih ve leh ngei ka in beisei," a ti. Tournament director Andre Silva chuan Djokovic inlan lo tur chu an ui thu a lo sawi ve bawk.

Tun season-a Grand Slam hnuhnung ber atan US Open khelh hmabak an la nei a, hei bakah hian ATP World Tour Finals khelh tur a la awm bawk.