RIO olympic 2016 Brazil an tlu rei lo; quarterfinal an lut

Rio Olympic football-a an match hmasa pahnihah Brazil-in hnehna chang zo lo mah se group stage match hnuhnung berah erawh an tho chiang hle - Denmark lakah 4-0 a hnehna changin quarterfinal an lut.

Brazil nge nge

Brazil tan Santos forward Ga-briel Barbosa-a'n goal hma-hruai a khung hnuah Man-chester City player thar Gabriel Jesus-a'n Brazil goal hnihna a khung chhunzawm a, Denmark-in tih theih an nei lo.

Second half-ah pawh Brazil bawk an langsar a, Neymar-a hote hian goal khung duhin an tuihal tih lantir nan Luan leh Gabriel Barbosa hmang bawkin goal hnih dang an khung leh a, quarterfinal-ah Colombia an hmachhawn ang.

Olympic thlengtu Brazil hian an match hmasa pahnihah South Africa leh Iraq chu goal khung loin an inhnehtawkpui a, Iraq nen an inhmachhawn
ṭum phei chuan an ram mipuiten an au el hial - nimin zing an in-khelah erawh engkim a danglam ta. Match hmasa pahniha hmuh tur awm lo Neymar a hmuhnawm a, Barcelona for-ward hian goal khung lo mah se a ṭhiante goal khungna kawng-ah a thawh hlawk hle.

Brazil hmaah Denmark mualpho mah se Group A inkhel dangah Iraq leh South Africa 1-1 a an inhnehtawk avangin Fulham midfielder Lasse Vigen Christensen captain-na hnuaia khel Denmark hian quarterfinal an lut ve ta tho a ni.

Nigeria zuitu Colombia

Group B inkhelah Nigeria-in quarterfinal an lut chiang tawh tih an hriat avangin an inthlahdah niin a lang a, Colom-bia lakah 2-0 a tlawmin team pahnih hian quarterfinal an lut.

Japan-in Sweden lakah 1-0 in hnehna chang mah se Colombia an chak miau avangin group stage aṭangin an tla a, Japan tana midfielder Shinya Yajima-a goal khungin Asian team hi a chhanhim thei lo.

Mexico an tla

Olympic football champion lai Mexico-in beisei tur an nei ta lo - Rio Olympic-a gold lak nawn inbeisei team hi South Korea lakah 1-0 in an tlawm a, group stage aṭangin an tla. South Korea tan Chang-Hoon Kwon chuan he inkhela goal awmchhun hi khungin quarter-final-ah an ram a hruai thleng.

Group C inkhel dangah Germany chuan 10-0 in Fiji an sawp a, Freiburg forward Nils Petersen chuan goal nga khungin player langsar ber a ni. Petersen bakah hian Schalke midfielder Max Meyler chuan hattrick a siam a, Arsenal midfielder Serge Gnabry chuan goal hnih khung bawkin Fiji tan Germany quarterfinal kalkawng dal theih a ni lo.

Mangṭha Argentina

Nilaini zan inkhelah cham-pion beisei Argentina chuan Honduras 1-1 in an inhnehtawkpui thei hram a, quarterfinal lut tura chak mamawh team hian group stage an paltlang zo lo.

Honduras tan Anthony Lozano goal hmahruai khung chu Mauricio Martinez-a'n sut mah se minute 90-a nih tawh avangin Argentina tan goal dang khungna hun a awm tawh lo a, rin loh zawk Honduras-in quarterfinal an lut.

Group D inkhel dangah Portugal leh Algeria 1-1 in an inhnehtawk. Portugal tan Porto striker Goncalo Paciencia goal hmahruai khung chu Algeria-in minute nga hnu lawkah Mohamed Benkablia hmangin sut mah se Portugal hian quarterfinal an lut ta tho a ni.