Tlar hma kan nei ṭha tawk - Wilshere

Arsenal midfielder Jack Wilshere chuan Premier League nomawi inchuha club dangte el turin tlar hmaah player an neih
ṭhat tawk thu a sawi chhuak.

Tun nipui chhungin manager Arsene Wenger-a'n Borussia Mon-chengladbach aṭangin midfielder Granit Xhaka a lalut tawh a, nakina la ṭha tura ngaih defender Rob Holding leh striker Takuma Asano te a lalut tawh bawk.

Gunners hi tlar hnungah player inhliam an neih avangin inlak thar an la mamawh niin a lang. Valencia aṭangin German international Shkodran Mustafi leh West Brom defender Jonny Evans te nen sawi zawm mek an ni. Pathianni zan hian an league match hmasa berah Liverpool an hmachhawn tawh dawn avangin Wenger hian player thar a lalut a nih pawhin Reds an hmachhawn hman tawh lo ang.

Arsenal-in striker Alexandre Lacazette lei an dilna chu Ligue 1 club Lyon-in lo hnawl sak mah se Wilshere a zam lo a, champion theih a inbeisei.

England international Wil-shere chuan, "Tlar hma lam kan en a nih chuan goal khung tur chu kan nei ṭha tawkin ka hria. Mi hian manto taka Mesut Ozil leh Alexis Sanchez kan lakluh kha an theihnghilh tawh emaw tih mai turin thu an thehdarh ṭhin a, ka ngaihdan chuan league EPL club zingah chuan a ṭha berte zinga mi kan ni," a ti.

Wilshere chuan sawi chhun-zawmin,"Tlar hnungah inhliam kan ngah avangin kan indaih rih lo tih chu a chiang, mah se kei chuan Calum Chambers leh Rob Holding te lakah rinna ka nghat ngam," a ti.

Premier League manager
ṭanglai zinga a hna ngai chelh rei ber Wenger chungchangah lungngaihna tur a neih loh thu leh hlawhtlin duha tuihal a nih avangin beiseina nen season thar an thlir thu a sawi lang tel bawk.

French manager Wenger hian kum 1996 September thla aṭang khan Gunners hi a enkawl ṭan a, an club chanchina manager hlawhlting berte zinga mi a ni. Mahse, kum 2004 hnulamah league title a la lak pui leh lo - tunah hian season khat daih chiah contract a nei tawh a, tun season-a a chet dan hian a hma-lam hun a hril thui hle ang.