India-in Australia an ngam lo

Rio Olympic hmeichhe hockey inelnaah India team chu Australia lakah 6-1 in an chak lo. India hian chhiarkawp dan chuan quarterfinal luh theihna kawng la nei mah se a an kawng hi a ping tluk a ni tawh.

Ningania inkhelah world number 13 India an mualpho chhiang hle. Australia tan Jodie Kenny chuan goal hnih a khung bakah Kathryn Slattery, Georgina Morgan, Jane Claxton leh Georgina Parker te chual goal khat ṭheuh an khung bawk - India goal neih chhun hi hun tawp dawna Anuradha Thokchom khung niin he goal hian awmzia a nei thui lo hle.

India hi an group match hmasa berah Japan nen 1-1 in an inhnehtawk a, match hnih naah Great Britain 3-0 in an hneh lo. Australia an hneh loh leh tak avangin hian match thum an khelh tawh aṭangin point khat chiah an la hlawh chhuak. Group B-ah a mawngphah luahlumtu niin Japan nen an point a inzat.

Group B-ah hian United States leh Great Britain ten point kua ve ve an hmu tawh a, an hnuaiah point thum hmutu Australia leh Argentina te an awm. Group pakhat aṭang hian a sang paliin quarterfinal an lut dawn a ni.