I Day Football 2016 Zaninah Lammualah football hmuhnawm Shillong Lajong FC Vs Aizawl FC
Zanin dar 7:00 hian Aizawl FC-in I League aṭanga pet chhuak-tu Shillong Lajong FC an hmachhawn dawn a, I Day Football semifinal hmuhnawm en duh tan Lammual pan mai tur a ni.
I League-a an inkhel en turin pawisa tam tak sen a ngai, zaninah Rs 30/- in Lammualah Lajong leh Aizawl FC inkhel a en theih ang.
Thawnthu hlui
February 13-a Aizawl FC-in RG Stadium-a Shillong Lajong an mikhual ṭum khan mikhual club hre chiang lo chuan awlsam taka point hmuh theihna turah an ngai. Amaherawhchu Thang-boi Singto hoten point khat hlutna hriain Aizawlah point khat hmu tumin an khel a, an hmu - season tawpah Aizawl FC point hnih hloh pawi zia a lang.
Aizawl FC hian Shillong an tlawh hmain RG Stadium-ah Mohun Bagan 2-1 in an hneh a, Kolkata club hnehtu hmasa ber an nih bawk avangin MPL club an phur thar hle. Beiseina sang tak nen April 1 khan AFC-in Shillong an pan a, Joel Sunday hmangin minute khatna leka goal an khung bawk avangin MPL champion hi chak tura ngaih an ni hman. Amaherawhchu Aizawl FC-in Samuel Lalmuanpuia an ngam loh avangin 1-3 in an chak lo a, Zemabawk North tlangval hi man of the match a thlan a ni.
I League hnuhnung berah Aizawl FC hnuaiah tla ve thei lo DSK Shivajians chiah an awm a, MPL club result ṭhat loh chhan hi tawnhriat neih tlem bakah Shillong club an zuam sual vangah a ngaih theih.
Hei le, Samuel chu
Shillong Lajong-in group stage-ah goal khung tam berin goal kua an khung a, chung zinga goal thum chu Samuel Lalmuanpuia khung a ni.
Lajong-in Ramhlun North 4-1 a an sawp ṭumin Zemabawk North tlangval hi a langsar ber a, Zo United 2-1 an lehthal
ṭuma Shillong goal hnih hi Samuel-a khung a ni bawk.
Thangboi-a hote hian Dinthar FC lakah chiah point an hloh a, hemi ṭum hian Samuel-a hi hahdamtir a ni.
Aizawl FC-ah pawh khel ve zawk tawh hian goal khung bakah ṭhiante goal khung tura siam a thiam bawk. Zo United lama chakna goal khung tur hian Samuel-a hian defender pathum a bum!
Tlar hnung pawp?
Shillong Lajong FC defence laia inkawp Nim Dorjee Tamang leh Sandeep Singh te I League-a inlan zat belhkhawm chu match 24 a ni - semifinal-ah hian hrem vangin Sandeep a inlan thei dawn lo.
I League-a vawi 15 zet inlan Sandeep hi I Day Football-ah pawh a la inlan kim vek a, hrem a nih takah chuan Lalhmangaihsanga a inlan a rinawm. Armed Veng South rawlthar hi tun inelnaa vawi hnih a inlan ṭumin goal hnih an chhuahna chhanah mawhphurtu a ni. Chutihrualin kum naupang tê ni chunga Lajong defence laia a din theih avangin a chhuanawm hle.
Lajong hian group stage-ah goal li an chhuah a, goal venhim kawngah chuan inchhuang tur an ni lo. Goal nawr lamah erawh Samuel, Lalrammuana, Milan Basumatary, Redeem Tlang leh Bipin Singh te awmna team hi an chhe thei lo.
Midfield laiah Jacob Lalrawngbawla, Joseph Lalfakzuala leh Hardy Cliff Nongbri te an kawl bawk avangin Lajong inkhel hi football tui inti tan chuan hmaih phal chi a ni lo.
Aizawl FC lam
Aizawl FC coach K. Mal-sawm-kima player zingah hrem tuar an awm lo a, amaherawhchu goal khung thei striker a nei lo.
Bright Middleton Mends hi foreigner awm chhun ni mah se a ṭhatna hi goal aṭanga teh tur a nih chuan a hlawh a phû lo. Chutihrualin Mends hian ball pass a thiam avangin a ṭangkai tho a; striker berin goal khung an harsat takah chuan winger pahnih Brandon VL Remdika leh Albert Zohmingmawia te an pen chhuah a ngai ang.
I Day Football champion lai tlar hnung hi Mizo defender ṭha awm khawmna tia sawi ni mah se a phui ṭha lo. Shillong-ah Aizawl FC hi an mualpho tawh a, Lammualah insiamṭhatna hun ṭha an nei hi an vannei hle a ni.
Eng nge an sawi?
Lajong coach Thang-boi chuan, "Sandeep awm lo tur chu a pawi khawp mai, player naupang zawk tan hun ṭha a ni ang" tiin Vanglaini palai a hrilh.
Aizawl FC coach K. Mal-sawm-kima chuan, "I League-a kan hmachhawn Lajong nen kha chuan an inang tawh lo. Group stage-a kan khingpuite aiin an ṭhat zawkna ka hmu lo a, kan hneh theih ngei pawh ka ring. Kei chuan phuba lak lam ka ngaihtuah lo a, final thlen hi kan tum a ni," tiin chak a inbeisei thu a sawi.