Dai ngai loh ramah Pep & Conte
Premier League-ah sum a tam a, chumiin a ken tel chu khawvel huapa player langsar ber ber leh coach
ṭha ber berte hip khawm a ni. Inelna hmuhnawm leh ngaihnawm ṭan nan ni khat chiah a awm ta.
Season thar Premier League-ah ṭum dang zawng aiin thluak hmanga inbeihna nasa tura beisei a ni - Arsene Wenger (Arsenal), Claudio Ranieri (Leicester City), Jurgen Klopp (Liverpool) leh Jose Mourinho (Manchester United) te awmkhawmna a ni tlat!
Manager tawnhriat ngah leh langsar tak tak zingah English football-a chona thar hlak hmachhawn tur pahnih an awm - Manchester City enkawl tur Pep Guardiola leh Chelsea boss thar Antonio Conte te an ni. Manager pahnih hi an sulhnu enin ropui viau mah se an la tawnhriat loh rama kal an nih miau avangin an dinhmun tur hi hriat châkawm chu a ni.
Pep Guardiola (Man City)
Spanish manager hi khawvela coach ṭha ber ang hiala sawi ni ṭhin mah se a team enkawl tawh hi Barcelona leh Bayern Munich an nih miau avangin eng manager tan pawh a club enkawl ang kaihruai chung hi chuan hlawhtlinna chhar a harsat loh tur thu sawi a ni
ṭhin - tunah sum ngah City a la pan zui!
Mahse, Guardiola sawiseltuten an hriat loh chu hei hi a ni - Pep-a'n Barcelona a enkawl hma season-ah khan Catalan club hian eng nomawi mah an chawi lo a, league-ah pathumna nichungin season an khar. Guardiola-a'n a season hmasa berah harhtharna thlenin champion theihna zawng zawngah champion-in nomawi paruk a chawi nghal.
Vawiina Manchester City dinhmun leh Pep-a'n Barca a enkawl tirh kha a inang hle - palina nichungin season an khar a, Barca ang thoin Champions League semifinal-ah an tlawm. Nou Camp-a season li hun a hman chhunga nomawi 14 chawi thei manager hian City-ah harhtharna a thlen thei ang em? tih chu zawhna a ni.
Manchester City-in season hman zawh tak league -ah goal 41 zet an chhuah a, Pep-a'n tlarhnung thawm ṭha turin pound maktaduai 47.5 man John Stones lalut mah se ṭum dang ang thoin a sum sen hnemna chu tlarhma lam a ni a, Leroy Sane, Nolito leh Gabriel Jesus te manah pound maktaduai 70 chuang a seng tawh - City-in attacking football uar manager hnuaiah goal tam tak an khung ngei a rinawm.
Antonio Conte (Chelsea)
Season hman zawh takah Chelsea-in beisei an phak lo a, Premier League champion lai nichungin table-ah 10-na dinhmun luahin season an khar. London club tan team tluchhe mek din thar tur chuan Antonio Conte aia chhanna ṭha zawk an awm chuang lo.
Kum 2011 khan Italian manager hian kum kaw chhung Serie A nomawi chawi loa awm tawh Juventus a enkawl ṭan a, pasarihna nichunga season khartu club hi a season hmasa berah Italian league-ah nomawi a chawipui nghal! Season hnih dang cham chhunzawmin league nomawi a chawi vek a, Serie A Coach of the Year-ah kum thum chhung a zawna thlan a ni bawk.
Chelsea-in season hman zawh tak Premier League-ah goal 53 an chhuah a, club 19 zingah anni aia goal chhuah hnem chu club pariat chiah an ni - tlar hnung remthiam vanga hriat hlawh coach hian a tlar hnung remkhawm hi hna hmasaa a neih a ṭul dawn. Euro 2016 khelh zawh taka Italy-in match nga an hmachhawna goal hnih chiah an chhuah theih nana thluak bur Conte tan hna harsa niin a lang lo.
Mahse, Conte hian Juventus leh Italy-ah chuan Andrea Barzagli, Leonardo Bonucci leh Giorgio Chiellini a nei a, heng defender pathum ang hi Chelsea-ah chuan a nei dawn lo - season hmasaa tla tlum lo captain John Terry chu tlar hnung lamah a innghahna tur a ni dawn a, Conte hna a hautak sawt dawn tihna a ni. Eng chen tak thleng ang maw?