Premier League kan nghak chhuak ta

August 13, vawiin hi Premier League ṭan hun chu a ni. Champion lai Leicester City-in tlai dar 5:00 hian KC Stadium-ah Hull City an tlawh dawn a, zan dar 7:30-a Everton leh Tottenham Hotspur inkhelin a chhunzawm nghal dawn. Inrinni zan inkhel bik kharna tur hi Pep Guardiola leh David Moyes fiahna a ni a - zan dar 10:00 hian Etihad Stadium-ah Manchester City-in Sunderland an inhmachhawn ang.

40 Points

Leicester City manager Claudio Ranieri-a'n champion lam a sawi lang lo, an tum chu point 40 a ni. Premier League-ah hian point 40 hmu chin chu an him tlangpui a, hei vang hian Italian manager thupui ber chu relegate loh a ni.

Foxes hmachhawn tur Hull City aia inpuahchah chhia a awm theih chuang loh. Premier League-a Tigers kai puitu coach Steve Bruce hi England manager tura sawi rik zinga mi a ni a, Three Lions manager ni turin Sam Allardyce tluk lo mah se kum 55-a upa hian a hna a kalsan. Sunderland manager hlui Bruce ban chhan hi Hull City vice chairman Ehab Allam nen an inhmuh thiam loh bakah club-in hmasawn an tum lo nia a hriat vang a ni.

Tigers hi Sir Alex Ferguson-a assistant hlui Mike Phelan-a'n a enkawl lailawk dawn a, an sawi dan chuan senior player 13 chiah inkhel tlak an awm. Hei vang hian nikum aia inpuahchahna nei ṭha Leicester hi match hmasa bera point thum hmu nghal tura ngaih an ni a, league-a an inkhelh tawhna hnuhnung pangaah pawh Foxes hi Tigers lakah an tlawm lo (W3,D2).

Leicester City player-te an dam kim vek a, defender Robert Huth erawh hrem vangin a la inlan thei dawn lo. Player thar forward Ahmed Musa leh midfielder Nampalys Mendy te an inlan ngei a rinawm a, Leicester hian Hull City hi an hneh chuan Ranieri-a'n Premier League-ah a club enkawl vawi 100 a chak puina a ni dawn.

Claudio Ranieri chuan, "Khawvelin Leicester tawp dan tur hi an hre châk a, kei ngei pawh ka bang bik lo. Kan champion dawn lo tih chu thil hriat sa a ni a, chuvangin pawisa thapna lamah pawh kan champion theih dan odds hi 6000/1 in dah zel se ka duh. Champion nawn hi a theih loh a, season liam ta ai khan kumin hi a harsa zawk bawk," tiin thu hmangin pressure pumpelh dan tur a zawng nasa hle.

English leagues sang berah hian champion laiin season hmasa bera chak loa bul an ṭan nghal chu kum 1989 daih tawh kha a ni a, Arsenal chu Mancheser United lakah 4-1 in an tlawm a ni. Foxes hian Gunners record chhuanawm lo tak hi nuai reh sak an tum lo ang.

Koeman Vs Pochettino

Tottenham-in season liam ta khan kum 26 hnua top flight-a an chetṭhat ber hun an tawng a, amaherawhchu season tawpah an hmelma Arsenal hnuaia an awm tho avangin Spurs ṭantute lawm a kim lo. Tottenham boss Mauricio Pochettino tan season ṭan nia Everton hmachhawn hi a fuh lo thei a, point an hloh a nih pawhin champion thei zingah chhiar tel an la ni tho ang.

Argentine manager hian nikum khan Eric Dier chu defence pui turin thiam takin a lo chhawr tawh a, kuminah erawh English midfielder pui turin Southampton a enkawl laia Celtic aṭanga a lakluh Victor Wanyama chu Spurs lamah a seng lut. Tlar hma lamah Harry Kane pui turin Dutch club AZ Alkmaar aṭangin Vincent Janssen an lalut - Dutch forward man hi pound maktaduai 17 a ni.

Everton manager Ronald Koeman chuan a player-te fitness chu 70% chauh a nih thu a sawi a, Southampton-ah chuan 100% a nih
ṭhin thu a sawi. Dutch manager chuan, "Inelna
ṭan chu a phurawm tawh viau a, amaherawhchu kan nih tur ang kan la ni phak lo. A bik takin physical fitness-ah 70% chauh kan la ni phak a, ka club hlui Southampton-ah kha chuan 100% kan ni ṭhin," tiin duhthusama an inpeih hman loh thu a sawi.

Koeman hian June thla khan Toffees hi a zawm a, Manchester City lakah John Stones chan mah se Swansea aṭangin Ashley Williams a lalut. Dutch manager chuan, "Player ṭha chelh chu ka duh a, football kalhmang ka hriat ang chiahin sumdawnna lamah beng ngawng ka ni lo," tiin Romelu Lukaku chhuak mai tura an sawi chungchanga zawhna a chhang.

Everton hi enliam mai theih an ni dawn lo a, an beisei anga player pali vel an lakluh leh chuan an ṭha sawt ang. Toffees tan Seamus Coleman (ngalrek) leh striker Romelu Lukaku (ke artui) te chu inhliam vangin an dinhmun a chiang lo a, Spurs defender Toby Alderweireld erawh Euro 2016-ah inhliam mah se a inlan theih beisei a ni. Tottenham midfielder Dele Alli hremna a zo tawh a, Mousa Dembele erawh hrem vangin a la inlan thei lo ang.

Guardiola Vs Moyes

Pep Guardiola hming a rik tawh chuan ngaihven loh phal chi a ni lo, Spain leh Ger-many-a hlawhtling tawh manager Pep-a'n England-ah bul a ṭan dawn. Manchester City khingpui tur Sunderland manager thar hi Spain leh Manchester United-a hlawhchham David Moyes a ni a, amaherawchu Scottish manager hi Everton-ah a hlawhtling tih theihngilh loh a ṭha.

Spanish manager hian Bayern Munich a enkawl laiin David Moyes-a enkawl United chu Champions League-ah an hneh. An intawn hmain Pep chuan, "Eng club mah player ṭha tel loin an champion thei lo a, kei chu ka kal tawhnaah player ṭha bik ka nei zel. Ka thawhpuiten min zah thiam bawk avangin ka vannei hle a ni. Manchester United-in thutlukna an siam sual ngai lo a, David Moyes pawhin Everton-ah record
ṭha a nei. Amaherawhchu club lian chu an chak loh chuan buaina a tam bik," tiin a sawi ṭhaih. Pep Guardiola sawi ang ngeiin Moyes hian club lian enkawl a zo lo tih chu khawvel hriat a ni.

Black Cats hi manager Sam Allardyce leh forward Jermaine Defoe season tawp lama an chetṭhat zarah an him hram a, David Moyes-a hnuaiah a rang thei ang bera him an duh ang. Sunderland hian an hmalam hi êng takin thlir mah se Etihad Stadium-a Manchester City hmachhawn erawh a châkawm loh.

Moyes hian a club hlui United aṭang-
in Adnan Januzaj, Paddy McNair leh Donald Love te Stadium of Light lama a sengluh bakah Senegalese centre-back Papy Djilobodji an la thar bawk. Heng player palite hi Eithad Stadium-a City hma-chhawn thei tura chhawr thei vek an ni. Sun-derland boss chuan, "Premier League-a ka rawn kir leh thei hi ka lawm a, season ṭha
tak kan hman ngei ka beisei," tiin a sawi a, Everton nena sawi zawm Lamine Kone pawh an chhuah loh tur thu a sawi bawk.

Manchester City boss Pep Guardiola chuan, "Thinlung zawng zawng nena khel tur chuan hun a duh dawn a, amaherawhchu thinlung zawng zawng nena khel thei lo tan ka team-ah hmun a awm lo," tiin theihna zawng zawng nena khel turin player a fuih. City boss thar hian player chhuak tur leh lut tur lam a sawi duh lo a, August 31-ah engkim a chian tur thu nizan press conference-ah a sawi.

Bayern Munich manager hlui Pep chuan, "John Stones-a fitness a ṭha a, talent nei ṭha tak a nih bawk avangin kan tan player pawimawh tak a nih theih ka beisei. Stones hi Sunderland hmachhawn turin a inpeih a, Leroy Sane erawh ka bulah training a la nei loh avangin a la inpeih lo," tiin player thar chungchang a sawi.