Barca hmachhawn tur team huaisen Sevilla

Pathianni zan dar 1:30-ah Barcelona leh Sevilla te Super-copa de Espana nomawi inchuhin an inhmachhawn dawn. Spanish Super Cup hi double legged-a khelh tur niin Sevilla khelmualah an inhmachhawn hmasa phawt ang a, August 17 zanah Nou Camp-ah an inhmachhawn leh ang.

Spanish Super Cup hi dan pangngaiah chuan La Liga cham-pion leh Copa del Rey champion-in khel ṭhin mah se season hmasaah Barcelona-in nomawi pahnih an chawi avangin Spanish Cup final-a an hneh tak Sevilla nen nomawi hi an inchuh dawn a ni.

Barcelona-in pre-season friendly match-ah Liverpool chu 4-0 laiin an hneh lo a, zanina an mualpho chuan nomawi an hloh dawn - Sevilla lakah an theihna zawng zawng nen an khel ang. Luis Enrique-a'n tun nipui bazar-ah a player pawimawh Dani Alves a chan a, Brazilian defender hmunruak hnawhkhah a hautak dawn.

Catalan club tan goalkeeper Marc-Andre ter Stegen chu hliam vangin a inlan thei dawn lo a, Claudio Bravo chu Barca si ban nghak tura beisei a ni. Olympic football khel tura thangbo Neymar a awm dawn lo a, mah se Lionel Messi leh Luis Suarez an la awm cheu avangin Sevilla tlarhnung tan inthlahdah a thiang lo ang.

Sevilla-in season thum chhung Europa League nomawi chawipuitu coach Unai Emery chu Paris Saint-Germain lakah chan mah se coach thar Jorge Sampaoli hnuaiah an indin mek a, ngaihnep chi an ni lo.

Argentine manager kaih-hruaina hnuaiah hian Real Madrid chu UEFA Super Cup-ah 3-2 in hneh lo mah se khelmual chhungah team huaisen an nihzia an pholang a, Real manager Zinedine Zidane chuan inkhelh zawhah Sevilla khelh dan hi hahipin a fak hial - Barca tan zuam sual theih an ni.