RIO olympic 2016 India hockey team-in quarterfinal lut
Moscow Olympic Games 1980 khan India mipa hockey team chuna quarterfinal an lo lut tawh a, hemi hnu hian group stage an la paltlang leh lo. Ningani zan khan India chu Netherlands lakah 2-1 in chak lo mah se Group B inkhel dangah Argentina leh Germany te an inhnehtawk avangin Rio Olympic mipa hockey quarterfinal an lut a, kum 36 chhung zet record duhawm lo tak awm tawh chu thai bo a ni ta.
Olympic Hockey Centre, Deodoro Park-a inkhelah world number 2 Dutch tan Rogier Hofman chuan minute 32-naah goal hmahruai a khung a, India tan VR Raghunath chuan penalty corner hmang ṭangkaiin an siphurh sut mah se Mink van der Weerden chuan minute 54-naah Netherlands chakna goal a khung.
India hian Ireland leh Argen-tina te an lo hneh tawh a, point ruk hmuin an hneh loh pahnih Germany leh Netherlands te chiah an chungah an awm avangin quarterfinal an lut. India hian an group match hnuhnung berah tla chiang tawh Canada an hmachhawn ang a, hmun ruak pakhat dang la awm chu Argentina leh Ireland ten an inchuh thung dawn a ni.
Badminton
Ningani zan khan Indian shuttler ten badminton inelna an nei ṭan ve ta. Hmeichhe singles-ah Saina Nehwal leh Pusarla Venkata Sindhu ten hnehna an chang a, mipa singles-ah Kidambi Srikanth chuan hnehna a chang ve bawk.
2012 London Olympic Games bronze-medallist Saina chuan Group G-a a match hmasa berah a thlengtu Brazil shuttler Lohaynny Vicente chu 21-17, 21-17 in a hneh. World number 1 hlui Saina hian Pathianni zan dar 5:30-ah Ukraine nula Marija Ulitina a hmachhawn leh ang.
Indian shuttler tho Sindhu chuan Hungary aiawhtu Laura Sarosi chu 21-8, 21-9 in a hneh ve bawk. Kum 21-a upa Sindhu hian Pathianni zan dar 4:45-ah Canada nula Michelle Li a hmachhawn ve leh thung dawn a ni.
Mipa singles-a India aiawh-tu awmchhun Srikanth pawhin a Olympic match hmasa berah Mexico tlangval Lino Munoz chu 21-11, 21-17 in a hneh ve bawk.
Singles player pathum ten hnehna chang vek mah se doubles-ah erawh Indian shut-tler-ten beisei an phak lo thung. Hmeichhe doubles-ah Jwala Gutta leh Ashwini Ponnappa te ṭangdun chu seeded pakhatna Japan duo Misaki Matsutomo leh Ayaka Takahashi te lakah minute 38 chhungin 15-21, 10-21 in an chak lo. Mipa doubles-ah Sumeeth Reddy leh Manu Atri te chu Indonesia shuttler Hendra Setiawan leh Mohammad Ashan te lakah 21-18, 21-13 in an chak lo ve bawk.
Tennis
Sania Mirza leh Prarthana Thombare te ṭangdun chu hmeichhe doubles-ah an tla nghal a, Rohan Bopanna leh Leander Paes te pawh hneh nei loin an tawp. Tennis inelnaa India beiseina neih chhun chu Mixed doubles chiah a ni. Ningani zan khan Mirza leh Rohan Bopanna te ṭangdun chuan hnehna an chang ve leh ta.
Mirza leh Bopana te hian Australian pair Samantha Stosur leh John Peers te lakah minute 73 chhungin 7-5, 6-4 in hnehna an chang. Indian pair hian Great Britain aiawhtu Andy Murray leh Heather Watson te an hmachhawn leh ang.