Swansea player manto ber Borja

Premier League club Swansea City chuan an club chanchina player manto ber ni turin Atletico Madrid striker Borja Baston chu pound maktaduai 15-in an lalut a, kum li chhung atan contract an ziahpui.

Kum 2013 khan Swansea hian an player manto ber ni turin Wilfried Bony lei nan pound maktaduai 12 an lo seng tawh a, pound maktaduai 3-in Spanish striker hian a rawn khum ve leh ta a ni.

Swansea tana jersey number 10 ha tur striker chuan, "Club player manto ber nih chu pressure a sang duh a, mah se pressure ṭha chi a ni. Kan man phu tawk ang ngeia khelhchhuah ka duh a, goal tam tak ka khung theih ka beisei a ni," a ti.

Kum 23-a upa striker hi Atletico Madrid youth system chhuak niin senior team tan erawh vawi khat chiah a la inlan a, season hmasa khan Eibar-ah loan-a hun hmangin La Liga match 36-a inlanah goal 18 a khung thei a ni.

Wales club hian Borja hma hian Spain international Fernando Llorente, Dutch defender Mike van der Hoorn, Dutch winger Leroy Fer leh Australian keeper Mark Birighitti te an lalut tawh a, coach Francesco Guidolin pawh a hlim hle.

Kum 60-a upa manager chuan, "Squad ṭha tak kan nei nia hriain ka hlim ṭhin a, tuna ka hlimna erawh a hma ai zawngin a nasa lehzual a ni. Fernando Llorente leh Borja Baston te kan lalut thei a, anni pa-hnih lakluh hi keini tan chuan a hlu lehzual a ni," tiin FIFA U-17 World Cup 2009-a Golden Shoe dawngtu Borja an lakluh naah a sawi.