German Super Cup Dortmund hmaah Ancelotti tan fiahna hmasa

Bayern Munich-in Manchester City lakah Pep Guardiola an chan a, Spanish manager thlak nana an lak chu tawnhriat ngah coach Carlo Ancelotti a ni. Italian manager hian German club a enkawl hnua fiahna hmasa ber chu Pathianni zan dar 12:00-ah a hmachhawn dawn a, an elpui kumhlun Borussia Dortmund nen German Super Cup an inchuh ang.

DFL Super Cup-ah Bundesliga leh German Cup champion team an inhmachhawn ṭhin a, Bayern Munich-in season hmasaah nomawi pahnih an chawi avangin league-a pahnihna Borussia Dortmund nen an inhmachhawn dawn. Thomas Tuchel-a hnuaia insiamṭhat tum mek club hian nipui bazar-ah player pariat lei nan pound maktaduai 95 bawr vel an seng tawh a, zaninah an bazar fuh leh fuh loh a hriat ang.

Dortmund player thar zingah Bayern laka an lo chan tawh Mario Gotze a tel a, Germany international hi a theihna leh thiamna Bayern hmaa pholan chakin a tuihal ngeiin a rinawm. Hetihrual hian Dortmund captain hlui Matt Hummels-a'n Bayern a pan ve thung a, Signal Iduna Park-a inkhel turah hian a inlan a nih chuan Dortmund fan-ten an dimin a rinawm hran lo.

Germany international Thomas Muller-a'n Bayern-a a teammate thar Hummels chhan lawkin Dortmund tan a theihna zawng zawng a hlan thu leh fan ten an lo au el a nih pawn defender tawnhriat ngah chu a buai loh tur thu a sawi. Hetihrual hian Borussia Dortmund CEO Hans-Joachim Watzke chuan Allianz Arena-a hlawhtling lo Gotze chu Bayern-a a hlawhtlin loh chhan chu club hotuten dawt an hrilh vang niin a sawi - inkhel boruak a sang dawn.

Bayern Munich tan pound maktaduai 30 man Renato Sanches chu a hliam ala dam chian loh avangin a inlan theih a beiseiawm loh a, mah se Portuguese winger tel lo pawha Bayern ṭhat zia chu hriat sa a ni. Dortmund-in hliam vang thoin captain Marco Reus an chhawr theih a la rinawm loh a, mah se kum 27-a upa winger tel lo pawhin Andre Schurrle, striker Pierre-Emerick Aubameyang leh French rawlthar duhawm Ousmane Dembele te an la awm cheu avangin Bayern tlarhnung tan awlsam taka hnathawh theih a ni dawn lo.

Bayern Munich-in kum thum chhung Super Cup nomawi chawi thei dinhmuna ding chungin an chawi lo tawh a, forward Thomas Muller chuan, "Nomawi satliah a ni lo a, a hlu bik a ni. Hun engemaw chen Super Cup nomawi chawi loin kan awm tawh a, theihtawp kan chhuah dawn a ni," tiin tih mai mai an tum loh thu a sawi.