Premier League a hmuhnawm nghal dawn Gunners khelmualah Reds an sen zo dawn em?
Liverpool manager Jurgen Klopp-a'n, "Khawvel hi kum maktaduai thum chuang tal a la awm ka beisei a, chutih hunah chuan he club ṭantute hian 2016-17 season hi chhuang taka thlirkirin season danglam bik a nihzia sawi se ka duh a ni," tiin hriat reng tlak season hman a duh thu a sawi a, a bul ṭanna tur chu Arsenal a ni - Pathianni zan dar 8:30-ah Emirates stadium-ah an lenglut dawn.
Arsenal manager Arsene Wenger a ngawi mai mai bik lo, French manager chuan, "Club lian zawng zawngin tumna thar nen hma an la a, keini pawhin
ṭum dang zawng aia season ṭha zawk hman kan duh avangin tun ṭum chu ka helhhawlh hle a ni," tiin a sawi a, Premier League khel turin a phur tawh hle - Reds an hmachhawn zawhah phur chhunzawm zel tak ang maw?
Tlarhnung buai Gunners
Arsene Wenger-a'n Man-chester City nen pre-season friendly match an khelh
ṭuma inhliam defender Gabriel Paulista chu kar li tal a chawlh a ngaih tur thu a sawi a, centre-back Per Mertesacker chu hliam vanga thla li tal a chawlh a ngaih tur thu sawi a lo ni bawk.
French manager hian Euro khelh chauh vanga team zawm tlai Laurent Koscielny chu a in 'fit' hman a rin loh thu a sawi bawk si avangin Arsenal-in defense laia khel turin kum 21 leka upa Calum Chambers leh kum 20-a upa defender thar Rob Holding te chiah an nei tihna a ni a, Gunners tlarhnung an buai takzet.
Wenger hian training-naah Polish rawlthar midfielder Krystian Bielik chu defensive midfielder Francis Coquelin nen a ṭul thuta centre-back a chhawr theih turin a khelhdun tir niin khawthlang media ten an tarlang a, Valencia defender Shkodran Mustafi an lakluh theih rih bawk si loh avangin Liverpool tlarhma tan Emirates Stadium-ah hna a awlsam sawt dawn tihna a ni.
Arsenal tlarhma lama Euro khel zingah Olivier Giroud leh Mesut Ozil chu Reds hmachhawn turin an inpeih hman a rin loh thu Arsene Wenger-a'n sawi mah se player pahnih hian Arsenal training an zawm leh tawh a, Liverpool an hmachhawn thut a nih pawhin a mak lo ang, Chilean forward Alexis Sanchez-a'n harsatna nei loin training a nei leh tawh bawk a, Reds defender tan inthlahdah a thiang dawn lo.
Hliam ngah Reds
Liverpool damdawi in a lun lo bik lo, dan pangngaiin striker Daniel Sturridge chu hliam vangin a chawl mek a, German manager Klopp-a'n English striker dinhmun a la hriat theih loh thu a sawi. Mainz aṭanga Liverpool zawmtu Loris Karius-a'n Reds si ban nghaktu rinawm ni tura theihtawp a chhuah tur thu sawi mah se a kut ruhah hliam a tawrh mek avangin Simon Mignolet-a'n Liverpool tan goal a veng ang.
Reds tan defender thar Joel Matip chuan hliam vangin ngai a la awh lo a, ani aiah hian defender thar tho Ragnar Klavan chuan inkhel bul a ṭan beisei a ni. Reds fan-ten pre-season friendly a che ṭha tak Marko Grujic-a khel an hmu chak tawh viau mah se Serbian rawlthar duhawm hi Mainz nen an inhmachhawn
ṭuma a inhliam avangin a la inlan thei dawn lo.
Midfield-ah erawh Liver-pool hi lungphang lutuk tur an ni lo. Emre Can leh Jordan Henderson an dam ṭha a, pound maktaduai 25 man Georginio Wijnaldum a awm tawh bawk. Tlar hma lamah James Milner inhliam mah se Reds-in pound maktaduai 34 man Sadio Mane, tlan chak Adam Lallana, Belgian rawlthar duhawm Divock Origi, ball thiam Philippe Coutinho leh Roberto Firmino te an la nei cheu a, Arsenal tlarhnung phuahchawp tan hmanni lawka Barcelona tlarhnung sawisatu Liverpool tlarhma dan a hautak dawn tih hi zep rual a ni lo.
Wenger-a zia a ngai!
Transfer bazar-a pawisa a hman tlem avangin Arsene Wenger sawisel a ni ṭhin a, a zia a la danglam lo! French manager chuan, "Pawisa hi danglamna thlentu a ni lo a, kan inelna tur chu sum hman hnem lamah niloin khelmualah a ni. Sum hman hnem vanga hlawhtling tura in inngaih chuan nikum table kha en ula, a chung berah Leicester City in hmu ang," tiin sum hman hnem ringawt chu hlawhtlinna a nih loh thu a sawi.
Wenger chuan Reds nena an inkhel tur sawi nghalin, "Season hmasaah pahnihna nichungin season kan khar a, a aia ṭha zawka season khar kan duh tawh avangin kan hmabak inkhelah chiah rilru kan pe rih a ni," tiin a sawi a, champion a tum ngam.
Liverpool boss Jurgen Klopp chuan, "Chhuang taka kan sulhnu thlirkir theih hi ka duh a, chu chu nun a ni a, chu chu football nun dik tak chu a ni. Season hman zawh ruala kan hun tawn kan theihnghilh chuan kan che ṭha tawk lo tihna a ni a, nakkum nipuiah chuan vawiina kan hun hman hi hlim hmel pu chunga thlirkir ka duh a ni," tiin a sawi a, nomawi chawi ngei a duh.