I Day Football 2016 Ramhlun N thlipuiin Chanmari a nuai

I Day Football final thleng turin Ramhlun North FC-in champion rinkai Chanmari FC chu 2-1 in a hneh.

Player neih dan thlirin Chanmari hi chak zawk tura rin ni mah se minute 90 chhunga an khelh dan thlir chuan final luh phu zawk MPL kai thar an chak.

Nimin inkhelah hian Ram­hlun North forward pahnih Vanlal­thlamuana leh MC Malsawmzuala ten goal an khung ve ve a, minute 90-naa Malsawmfela goal-in Chanmari FC a chhan pha lo.

Ramhlun North hi MPL kai thar chauh ni mah se I Day Football-a ṭantu nei ṭha ber an ni a, hming langsar Sawmfela aiin a nau Thlamuana a che ṭha zawk bawk.

I Day Football final hi August 15, Thawhṭanni dar 3:00 hian Lammualah khelh tur a ni a; Ramhlun North khingpui tur nizan lama Aizawl FC leh Shillong Lajong inkhel result kan ziak hman lo.

Engtin maw an khelh?

Ramhlun North-in khel thei lo B. Malsawmzuala aiah David Lalrinchhana an luhtir a, Lawngtlai defender Lalruatfela hrem mah se tawnhriat ngah zawk C. Ram­dinmawia a dam leh tawh.

Chanmari FC-in hrem vanga khel thei lo R. Malsawmtluanga aiah Reuben Zosangpuia an luhtir a, hming enin thutlukna mak ni lo mah se Dinthar tlangval hi tun I Day Football-ah a vawi khat inlanna chauh a ni.

Tlar hnungah C. Lalmuanawma thlak nan coach Lalsangzuala Hmar-in tun inelnaa la inlan miah lo MS Dawngzela (Notea) a thlang a, C. Lalrosanga a awl daih thung.

Tawia naute

Ramhlun North coach Lalruat­liana Sailo (Tawia)-in a naute lei hrula ball inpe turin a zirtir a, an khingpui Chanmari FC ni mah se Ramhlun North-in ball an inpe ngam. First half-ah Zosangliana (Chhaia) chu ball semtu a ni a, chak tura rinkai lo zawk Ramhlun North-in inkhel an thunun.

Tlar hmaa hming langsar zawk Chanmari FC-in goal khungna chance ṭha an ngah zawk thung a - minute 14-na lekah Lalrammawia'n keeper chiah a hmachhawn hnua a pet over chu a hlah ho hle.

Rammawia ball petu Malsawmfela bawkin Lalruatfela Zote tan ṭha takin siam mah se Republic Vengthlang tlangvalin a tlawh goal thei lo. Chanmari FC winger Lalmuanzova goal hmaah a hriam lo a, coach Sanga hote goal hmaah an vannei lo.

Ramhlun North player-te an dawh thei a, Chanmari keeper Lal­­muan­mawa tana harsa tur khawpin goal chance nei lo mah se forward MC Malsawmzuala chu defender Notea tan buaina tham a tling.

Minute 38-naah vei lam
aṭanga David-a ball vawrh ṭha zet chu Thlamuana'n a tauh lut a, khel ṭha zawk Ramhlun North-in hma an hruai a, Chanmari ṭantute an hawi hai hle.

An talbuai lo!

Chanmari FC-in goal sut ngei tumin second half-ah AIFF Under 19 lama goal khungtu Ṭhasiama leh Lalrosanga te an inlan a, vawi khat inlannaa talbuai Reuben leh Notea te an thlak.

Ramhlun North lamin awmze neiin an la khel chhunzawm tho a, MPL kaithar an talbuai loh laiin Chanmari FC erawhin beisei an pha lo chhunzawm zel.

Lalsangzuala Hmar hoten midfielder R. Malsawmtluanga tel lo an tuar tih hmuh hmaih rual a ni lo a, chutihrualin an khelh dan thlirin semifinal aiin final an mitthla lawk nasa mah mahah a ngaih theih bawk.

Chak duh luatah Chanmari FC-in mimal game an khel a, talent nei ṭha Sawmfela tal na
ṭhin viau mah se Ramdina leh Lalramthlamuana te an inthlawp
ṭhat tlat avangin goal a keng tel lo.

Chanmari -in goal nawr nat an tum viau nachungin midfield-ah khi a awm tih a lang. Goal mamawh hunah coach-in goal nawr na tak Fela Zote defensive midfielder-a a suan lêt daih main mak tih a hlawh a; winger pahnih Ṭhasiama leh Muanzova-ten a sir aṭangin hna an thawk ṭha lo. Ramhlun North chu second half-ah pawh team
ṭha zawk an la ni tho.

Ramhlun North forward pahnih Thlamuana leh MC-a te an inthlawp fuh tawk lo ṭhin nachungin team phurna a san avangin an buai phah lo - ṭha takin an khel zel.

Chanmari FC-in goal khung an tum luatah tlar hnung a pawp zeuh zeuh a, MPL kaitharin an hun ṭha neih an hmang ṭha tawk ṭhin lo. Chutihrualin Ramhlun North hian goal an neih tawh miau avangin tlar hnung erawh an rem phui hle.

Minute 81-naah Chanmari left back Zautea back pass sual chu keeper Muanawma inrawlh hmain Ramhlun North winger Jerry F. Zonunsanga a lang hmasa a, Royal Wahingdoh Academy chhuak hian penalty a hlawh chhuak. Siaha tlangval MC Malsawmzuala'n pet goal-in Ramhlun North thawm a ṭha hle.

Chanmari ṭantuten chak an beisei tawh loh vanga Lammual chhuahsan an tum laiin Ramhlun North defender Muantea kutin ball a fuh a, minute 90-naah Sawmfela'n an penalty hmuh chu a pet goal.

Minute li hun pek belhah Chanmari an tho chhuak thei lo a, MPL kaithar 2-1 in an chak.

Hu Hu Hu

Chanmari FC ṭantu aiin Ram­hlun North ṭantu Lammualah an pungkhawm tam zawk a, an au hla 'Hu Hu Hu' tih chu zam hma deuh tan chuan zamna tham a ni! Aizawl FC emaw Shillong Lajong emaw pawh chak se Lalruatliana Sailo naute hi rinkai lo zawk an ni zel dawn a, chuvangin Ramhlun North mipuiin an veng football club hi an thlahthlam a thiang lo ang.

Coach a lawm

Ramhlun North coach Tawia chuan, "Kan zir ang zawng zawng chuan kan tidik vek bik lo nachungin ka beisei aiin kan khel ṭha. Player-te'n an tihtur
ṭheuh an ti a, MC-a leh Ramdina te inhliam chungin khel mah se team tan theihna zawng zawng an chhuah a ni. Team kan inlungrual a, Ramhlun North mipuiin min
ṭawiawm ṭha a, final kan thlen theih avangin ka lawm hle a ni," tiin an khelh dana a lungawi thu a sawi.

Penalty leh referee chungchang sawi langin Tawia chuan, "Referee chungah lungawi lohna tur ka hmu lo a, inkhel an thunun ṭha viauin ka hria. Penalty kan chawi kha ka hmu chiang thei lo a, amaherawhchu penalty area-a kan player kutin ball a fuh chuan penalty kan chawi tur a ni. Referee thutluknaah sawiselna tur ka nei lo," tiin Vanglaini palai a hrilh.

Semifinal Result

Chanmari FC 1 - 2 Ramhlun North

CFC : Malsawmfela 90'

RNFC : Vanlalthlamuana 38'; MC Malsawmzuala 81'