RIO olympic 2016 Spain tan Nadal a vul

Rafael Nadal tan Rio Olympic-ah gold medal pahnih dawn beiseina a la awm zel. Sapin tlangval hi mixed doubles-ah inhnukdawk mah se singles-ah quaterfinal a lut a, doubles-ah Marc Lopez nena a ṭang dunin final an lut bawk.

Grand Slam vawi 14 champion tawh Nadal hian seeded 15-na France tlangval Gilles Simon chu darkar hnih leh minute hnih chhungin 7-6 (5), 6-3 in a hneh a, quarterfinal-ah chuan khawtual tlangval Thomaz Bellucci a hmachhawn leh ang.

Brazil aiawhtu Bel-luc-ci hian Belgium star David Goffin chu 7-6, 6-4 in a hneh thung. Nadal tan Bellucci hi khingpui huphurhawm tak a ni hran lo ang, vawi nga an inhmachhawn tawh aṭang-in set a la hloh miah lo a ni.

2008 Beijing Olympic singles gold medalist Nadal hi 2012 London-ah khan khup na vangin a inlan lo a, kuminah pawh hian hliam vangin a inlan lo teuh hle. May thla khan a ban rek na vangin French Open aṭangin a inhnukdawk a - Olympic ṭan hma hian tournament a khel chhin miah lo a ni.

World number 2 Andy Murray pawhin Italian Fabio Fognini lakah set khat hloh mah se 6-1, 2-6, 6-3 a hnehna changin quarterfinal a lut ve bawk. Champion lai Murray hi a khelṭha tluang hle - Wimbledon champion niin tun hnaia a match hnuhnung 15-ah hnehna a chang fai vek.

Champion tura rinkai Novak Djokovic erawh singles leh doubles-ah hneh nei loin a tla a, hmeichhe inelna lamah world number 1 Serena Williams pawh a tla tawh bawk.