Jeje-a hoin India-in Bhutan an sawp
Inrinni tlai khan India chuan Thimphu khawpuiah Bhutan chu practice match-ah 3-0 in an hneh. India captain Jeje Lalpekhlua'n goal khat a khung bakah Sumeet Passi leh Holicharan Narzary te goal khung tur a siam sak bawk.
Bhutan khawpuia inkhelah Isaac Vanmalsawma chu sub-stitute bench aṭanga tlan lutin India tan a match hmasa ber a khel a, India squad-a Mizo player dang zingah Lallianzuala Chhangte chu second half-ah inlan bawkin David Lalrinmuana erawhin bench lamah hun a hmang tluan thung.
Jeje a thiam reng
Bhutan an hmachhawn hmain Jeje-a'n league an la khelh loh avanga an la in fit tawk loh thu Vanglaini palai hnenah sawi mah se khelmual chhunga an inkhelh meuh erawh chuan Chennaiyin forward hian a thiam a la theihnghilh lo tih a lang chiang hle.
Indian Football Player of the Year hian Sumeet Passi goal khung tur a siamsak hnuah goal a khung a, goal khung tur hian Bhutanese defender pahnih ven karah hmun awl insiamin vei lam kilah a pet lut. Jeje goal khung vanga an hlim au thawm pawh a reh hmain Mizo tlangval bawk hian a theihna a pholang nawn a, Holicharan Narzary goal khung tur siamsakin Assam winger tan hna harsa a awm tawh lo.
Jeje a lawm
Mizo tlangval Jeje-a'n FIFA World Cup 2018 Qualifier-a Iran leh Turkmenistan an hmachhawn ṭumin captain armband a hreng tawh a, hnehna an chang zo lo ve ve. Inrinni tlaiah erawh Mizo tlangval kaihhruaina hnuaiah India an chak ta.
Season hman zawh taka Mo-hun Bagan Player of the Season dinhmun luahtu chuan, "Ka captain-na hnuaia India ka chakpui vawi khatna a ni a, a nawm dan pawh a danglam bik khawp mai. Chutihrualin season thar atana ka match hmasa bera goal ka khung nghal avangin ka lawm hle bawk. Mahse, chung zawng zawng aia ka lawmna erawh squad-a Mizo player pali lai kan awm thei hi a ni a, hei aia tam zawk kan awm zel theih ka beisei a ni," tiin a mimal thawhṭhat aiin Mizo hming-
ṭhatna a ngaipawimawh zawk tih Vanglaini palai a hrilh.
Jeje chuan India squad-a Mizo player dang chanchin sawi nghalin, "Lianzuala leh Isaac te an inlan hnuah an khel chhe hran lo a, India team-ah pawh hmun an chan zel theih ka beisei. Hetihrual hian tawnhriat an la ngah tawk lohna erawh a lang leh ṭhin a, hei erawh hma an sawn zel avangin a danglam thuai ang," tiin Vanglaini palai hnenah a sawi bawk.